馮諾嘉手記：信賴1400犀利

纯情小彩迷

　　剛剛大年初三賽果相當正路，並無爆出大冷Q，相信唔少馬迷都有收穫，今日年初八，睇落去多場賽事嘅形勢都比上次混亂，唔知賽果仲有冇年初三嗰日咁正路，希望再次皆大歡喜喇！

　　十一場賽事，重點當然係第八場本地一級賽主席短途獎，跑草地1200米，相信大家嘅注意力會集中喺「蓮華生輝」身上，皆因佢喺香港速度系列賽事中，已經贏咗頭關百周年紀念盃，嚟到今日次關，一定會搏到盡。賽前同姚本輝傾過偈，佢話對呢匹馬相當有信心，佢呢匹鎮倉寶近兩場跑一級賽，贏來都有餘未盡，卡士全場最高，今次繼續做膽。

蓮華生輝鬥鳥語花香

　　大摩一向盃賽成績突出，今季雖然失色多少，但係今場派成三匹馬角逐，當中「鳥語花香」上場爭香港一哩錦標，只係以半個馬位之差輸畀「好爸爸」，前仗更加壓倒「蓮華生輝」贏馬，今日再次同場較量，一定好精采，配腳首選。拖埋大摩馬房「同一世界」，之前兩場一級賽都入位，走勢亦唔遜色。姚廐另一匹戰馬「極奇妙」，上場竟然可以同「蓮華生輝」串Q，但係練者一啲都唔感到意外，既然佢睇得咁高，配腳當然要預留一席畀佢喇！

　　心水場次仲有第三場四班草地1200米，用「驍騎無敵」做膽，上場雖然只係贏五班賽，但係後上彈甩對手成兩個幾馬位，走勢實在討好，今場上番四班爭連捷唔難。配腳方面，「麗晶之星」上場喺同程贏馬，仍配馬偉昌，乘勇再戰，三甲應穩。「駿盈」最近喺谷草搏咗幾場都未重開勝門，今次返番沙田跑贏馬唔程求交代，拖。「好歌」經常跑入前列，馬性忠心，今場唯一要克服嘅只係排大外檔，配腳一席要兼顧。

　　第五場四班草地1400米，馬膽「信賴」，上場跑田草1200米得第二，後上追勢好凌厲，睇番1400米往績，曾經有負重磅力拼「雅雪」得第二，就知呢程比1200米犀利得多，趁弗再搏，坐位望贏應該無問題。配腳先拖匹老馬「高智慧」，今季狀態長期保持，路程亦正宗。「龍騰」同「鉅業光輝」兩匹質新馬都做足工夫，冷腳之選。