馬主論戰

纯情小彩迷

四季大同出頭

　　今日我哋隻「霹靂槍」有份上陣，上場谷草1200米跑第六輸唔遠，今次跑番曾入Q嘅田草1200米，希望可以憑內檔同輕磅之助跑近，有獎金收都心滿意足喇﹗講番心水，重頭戲主席短途獎，最鍾意「鳥語花香」，唞夠上陣應該贏得。

　　  另一匹要留意嘅摩廐馬係第四場「四季大同」，雖然來港跑咗十八場都未出頭，但近兩仗演出確有進步，上仗更只係輸畀對手一條頸跑第三。今次轉跑曾入Q嘅泥地1200米，路程必合發揮，係時候出頭。

梁廷鏘

四季大同我愛您捧盃

　　  今日第七場十八區盃，我鍾告廐「我愛您」，上次初出跑田草1600米幾乎爆冷成功，只係輸條頸畀「勁快」跑第二，但已經衝贏季軍「國寶」，實力一啲都唔簡單。今次增程跑1800米，更啱呢匹後勁馬發揮，吼準盃賽先上陣，一定志不在小。

　　  另外推介第十場「超群如意」，在港四戰未甩過獎金，擺明有質素，近兩場都輸少少跑第二，只係運氣問題。今次再跑1400米，同場對手實力唔算強，只要陣上發揮正常，要贏番一場應該唔難。

張敬山

稻庭烏冬食得

　　  賀歲賽告東尼又起孖，既然搏殺手風咁順，今次當然要繼續吼實佢手馬。最啱心水係第六場「稻庭烏冬」，季內兩戰泥地一哩獲一季一殿，每次末段都衝得好勁，今次再跑同程兼初戴面箍上陣，只要交出後勁，隨時可以橫掃。

　　  另外要留意第九場「劍鋒」，睇佢早前響四班嘅贏馬姿態，冇理由現評分就行人止步。事實上呢隻馬係跑沙田1200米起家，今次轉場而戰一定啱發揮，繼續用卓利操刀會有合理賠率，小心一放到底。

任達華