馮諾嘉手記：質超駒路有專長

纯情小彩迷

　　剛戰「蓮華生輝」以大熱身分捧走主席短途獎，賽後話題當然離唔開呢隻馬下仗目標，究竟係跑速度系列尾關女皇銀禧紀念盃，定係遠征日本高松宮盃呢？馬主冼鏡煜前日就畀出一個較為明確嘅答案，似乎較為傾向全力爭取日本高松宮盃。

　　之前小妹同姚本輝傾過「蓮華生輝」嘅部署，當時佢都未有定案，只係話以往短途三冠嘅三關賽事只係要跑1000同1200米，所以較容易贏出三冠。雖然「蓮華生輝」以往響1400米亦曾入Q，但如果真係要響1400米同1200米兩項途程選擇其一，咁揀1200米高松宮盃出賽都無可厚非嘅！

　　睇番今次「蓮華生輝」贏主席短途獎嘅走勢，可以話輕鬆到極，若然真係遠征日本，應該都好有機會為港爭光，大家不妨拭目以待。

　　頭場五班一哩，小妺揀咗「好利高」做膽，評分已經減至38分新低，上次落到嚟五班跑，沿途走外叠都跑第四，證明十歲馬仲有兩腳，今次排五檔一定搏得就搏，配腳拖番「華劍寶」、「穩操勝算」、「國家富強」同「浪漫添馬」。

　　第二場四班1200米，小妹亦係鍾意伍廐馬，「質超駒」季內五戰同程，獲得兩冠兩亞一季，證明路有專長，上場初配楊明綸後上走勢甚勁，今次繼續交畀佢操刀，應該可以再接再厲。配腳方面，「奇蹟」落番四班跑會有唔同演出。「萬人迷」連仗跑近，要拖。「金巴利來」上仗已露走勢，咪睇小。「覓得寶」跑法主動，拖埋冇蝕底。