洪禮賢講馬：談笑用兵冇晒眼中釘

纯情小彩迷

　　  跑罷今期賽事，衛韜禮約滿撇得，對於馬友們而言，有利也有弊，身邊友人指出，佢走咗可能對佢波士係好事，起碼唔使成日搏親都係得個P，三月開始用吓其他人，或可創出另一片天云云。事實上，胡廐將帥自從走在一起，只得3W24P（99負），唔好計上名率高與低，好些馬匹的確係因騎者處理手法欠佳，令爭勝機會打折扣，最明顯又易記嘅梗係「馬之王」阻到「高手」那場。而周三夜馬亦有取位笨笨哋的鏡頭，如「廣友名駒」和「奇異福星」，就係睇到眼冤的演繹，唉，反而幾十倍的「玉峽生輝」，直路衝程暢行無阻，佢嘅功架真係失驚無神嚇死人。

衛韜禮約滿有利有弊

　　  但另一友人則認為沒有衛公子，反而唔好，有佢喺陣上，好多時自己買咗嘅馬便會少咗一匹對手，咁又真係冇講錯噃﹗衛公子久唔久自己塞死自己，又或攞錯位，無形中削減了坐騎競爭力，冇咗佢之後，賽事又會變番公平競技﹗兩位友人各有理據，不過，筆者認為，騎師陣上交唔到功課，長遠計當然唔係好事，有能者居之嘛﹗

　　  來到今期賽事，第四場1200米「談笑用兵」，初出已經有唔錯走勢，假如計番出閘反應普通（閘前忟咗），沿途跟得唔多順，直路又只係有限度用鞭，輸四乘幾已算叻。比較上，剛仗再出明顯學叻咗，出閘唔「甩咳」，前中段就算外叠也冇「片」，拉士爆上嚟既勁亦規矩，其實如果唔係二馬「六六精英」全程賺到盡，「談笑用兵」實有Q，睇嚟七字頭分數起步好濕碎。今場冇咗上二班仍幾乎贏到嘅「富高勝」在陣，仲邊有眼中釘，倘能持續進步，大有出頭機會。