馬主論戰

纯情小彩迷

太極至尊添食

  　　苗禮德近期搏殺手風好順，今次繼續吼實佢手馬應該冇錯，最鍾意第二場「太極至尊」（圖），在港兩戰直路賽獲一冠一季，雖然上次只係影相險勝「勁勇士」，但係已經彈甩咗第三名嘅「風動寶」，今場對手實力唔算強，應該可以添食。

　　  另一匹要留意嘅苗廐馬係「雄心馬主」，今季一直冇表現，但評分亦都因此下降，上仗響三班1400米殺入一席第四，已有復甦迹象，今次落到四班上陣，形勢完全唔同晒，話唔定可重開勝門。

梁廷鏘

太極至尊盈彩繽紛質高

  　　韋達今日停賽復出，即刻騎足十場上陣，而且多匹坐騎實力好強，要贏兩、三場應該唔難。最啱心水係第四場「盈彩繽紛」，上場初出跑直路賽，輕描淡寫之下已率先過終點，擺明質高過人，今次升上三班跑唔會有阻力，可以再贏。

　　  另外，「勇敢小子」已經五連捷，次次都係睇住對手嚟食，仲有幾多在手仍未知。今次增程跑1800米兼負重磅，客觀條件似乎有多少不利，但係超級馬向來唔怕受考驗，只要發揮正常，六連捷可期。

張敬山

最望有好日子

　　  今日重頭戲第七場香港金盃，雖然只得十一匹馬跑，但形勢並唔單純。

　    「好爸爸」跑2000米威力未必及1600米﹔「閒話一句」上仗表現又突然走樣﹔「爆冷」八歲馬戰鬥力好似有下滑迹象，幾匹高分馬似乎各有隱憂。

　　  比較之下，反而鍾意蔡廐「好日子」，近四仗獲一冠兩季一殿，即使落敗都響一個馬位內返嚟，演出夠晒準。最重要係六歲馬今季仍然有進步，即使今次跑平磅亦未必輸蝕，論銳氣係全場數一數二之馬，隨時捧盃。

任達華