洪禮賢講馬：喜綵檔好開齋

纯情小彩迷

　　韋達停賽，柏寶兩期擸6W，到了後者停賽期，韋冠軍又會如何，急起直追，還是雷聲大雨點小，真係兩睇﹗﹖而馬房方面，感覺上唔攬住阿蔡嘅馬，都唔知仲有咩馬房可以看重。

重心場次

第5場  第四班（65-40分）1400米

　　聖河此程既冇上名紀錄，上場亦幾乎連Ｑ都撻埋，看來唔多可靠，但就係咁換來十多倍值博率﹔此駒季初三班同程，曾在潘頓甩晒韁繩情況下輸近（與季軍「高智慧」僅差半乘），計水準冇理由在此場冇得爭，尤其有埋好檔慳腳程，季內未交代之馬唔會三心兩意。

　    「旅遊大亨」剛仗唔係初出已經會試吓水，表現則比預期更勁（出閘慢兼與騎者頂頭鎚），開完氣應該仲叻。「傑出君子」加了刺墊一樣於上場片來片去，但證明同程確係最佳出路，呢次負磅驟減更好跑。「軍士」向來都揀，唔會放棄。

　    「八逢九紫」少馬帶啱發揮，如掌握到步速，對手唔係咁易於直路反先。「綠野飛馳」上場有拖，演出恰如其分，惟今場加磅而繼續排外檔，有點憂慮。「靚得開心」落到四班一定有價講，唔係大外檔會納入考慮。

第1場  第五班（40-10分）1800米

　　壽比南山一心要落班，所以之前放或留，名次係點唔使理，打得王牌轉程，唔會冇企圖。「心喜悅」剛仗前已指出，唔多滿意前一場發揮，假使換人而在跑法上執番正，有權大幅提升名次，結果與超級馬串Ｑ，表現收貨。今場檔位差啲，但好多對手都有缺點，佢有十幾倍，博多次。

    　「金像太子」始終認為五班係幾超吓，轉倉初出已博定先，尤其路程合適。「心寶貝」、「飛躍星河」、「恒運財星」及「乘風破浪」冇話唔夠條件上名，卻又唔係冇隱憂。「嘉寶神駒」跑落係咁上吓，勝在長期喺三至五名。

第2場  第四班（60－40分）1000米

　　太極至尊對比兩賽成績，上場出閘改善了，就算出頭過早仍頂到尾，確認跑一場叻一場，除非加磅受壓，若不，仍可再Ｗ。「清新空氣」外地及在港試閘冇一次唔在前列過終點，如果唔係睇得唔打得，以佢嘅速度，唔難入圍。

    　「可圈可点」落班用韋達，心意好到極。「聖迪達」回到直路賽，只會比近仗更具殺傷力。「好快活」隔夜廿幾倍，啱晒，騎者冇壓力，落場跑會格外輕鬆，如今場早段夠快，有權爆上嚟，點講都係一再於三班同程輸近嘛。

第3場  第四班（60-40分）1200米

　　勇蹄飛谷草未好過，加上剛仗1000米明短，早段跟唔上而拉士仍有兩腳，算佢本事﹔重返四班的第二回合唔再犯險，來到最有根據的此程，仲排到內檔，夾正跑法及食到B+2欄形勢，冷門玩得過。

　    「松林之星」得個準字，買W唔抵，唔拖又好似唔啱數。「成功網絡」長期在前四名，情況一如前駒。「好歌」剛仗由頭錯到尾，名次不用計，檔好及換人，不妨畀機會。「靚好聲」初出大漏閘，返嚟輸短頭，過程好誇張，但唔知呢次閘前反應如何，要博。「龍船旺」和「藍老虎」有班，邊線馬。

第4場  第三班（80-60分）1200米

　　談笑用兵一場叻過一場，短期內進幅緊要，只要做啱留放，阿杜唔好一如上場走多咗冤枉路，有能力補中。

　    「六六精英」剛仗唔係一步不蝕，冇可能頂到條Ｑ，尚幸今場減輕負荷，但十四檔難跑。

　    「盈彩繽紛」初出冇點打過收韁贏個幾身位，係超班或地利也不用計得太清楚，再跟。「千江映月」姑勿論上場係隻馬本身情緒波動難留，抑或騎者處理有不妥，總之計番前仗上名姿態唔係講笑。「飛快勇」班底厚，落班縮程仲覺有啲嘢，大冷拖吓腳。

第6場  第四班（60-40分）1600米

　　喜綵一再因排外檔令蔡仔發揮不稱職，今場三檔唔會三叠啩﹗﹖如交到兩仗前的跑法及水準，邊有對手﹗「愛睦善」上賽已建議拖多次，最終因直路彎走多咗連Ｐ都冇，但至少證明已經回夠氣，來到季中又有番用。

　    「越跑越有」重磅及外檔唔係冇影響，但跑法機動或可克服。「勁快」之前操練流程曾有阻窒，唔知影響有多大。「勁惑」如果唔係一擔砂糖，一擔咩﹗以佢剛仗用小蘇都有咁強追勢，呢次出動到大蘇，更值憧憬。「雄心馬主」唔明點解唔報1400米，若根據近仗表現則差唔多「起腳」。

第7場  本地一級賽 2000米

　　爆冷和「閒話一句」各有可取之處，加上近4屆大摩在金盃冇Ｗ有Ｑ（3冠1亞1季1殿），一對有級數之馬必揀。

    　「自由好」連在董事盃也跑得好，來到長途只會仲犀利。「好日子」與「好先生」又係準，但前駒冇乜此程經驗，後駒則有晒根據。「好爸爸」此程實可應付，只係殺傷力唔會有一哩咁大。

第8場  第一班（105-80分）1800米

　　勇敢小子冇乜好講了，跑五場贏晒，點好喺賽績已反映了。「牛精財星」終肯趁住回起期重返此程，未必係副車。
    「漂亮第一」剛仗輸到唔知點解，可能係蝕位，又可能係地淋，但前仗才與「極品絲綢」串Ｑ，喺度實夠分量。「勇者無敵」長期喺「方」，假如檔位形勢幫一把，有權提升威力。再數落去稍有機會已經係「利好」及「零距離」。

第9場  第三班（80-60分）1400米

　　好心星直落三場冇W有Q，尤其見佢上場贏來唔似得前仗咁片，已知道進度快，唔擔心加分要需時消化，上三班亦冇有怕。「安御」軟顎唔移位，在班內惡得交關。

    　「太陽能」放完草，而本身休出好，或有很大幫助，而重返此程又會比一哩啱。「座頭市」冇慢地，未必可一可再。「最佳拍檔」賽前工夫唔似樣。「勁有盈」上場個Ｐ毫無威脅。「極速之星」唔多馬走，有機會食正形勢。

第10場  第三班（80-60分）1600米

　　馬主精英早已指出跑得番，目前分數賺到笑，好開當然繼續追。「傳奇快車」跑落去冇突破，嘗試加程亦啱時機。

    　「駿馬精英」重新開氣，來到第二回合會叻多少。「易搏贏」唔跑窄場，特登轉場，信心好大。「生生不息」又可能受惠呢場步速唔快的環境。