巴塞太強殺無赦

猪拉多纳

華倫靠靚籤入4強已賺凸

西班牙盃4強首回合重頭戲，巴塞隆拿主場鬥華倫西亞，兩軍狀態天與地，衞冕嘅巴塞豪取8連勝，至於華倫近5仗取得1勝3和1負，對手仲只係華歷簡奴、希杭等弱旅，咁都贏唔到，點同「地上最強」鬥？巴塞近6仗主場有5場係淨勝2球或以上，今場讓2球都照捧讓球主勝！

（周四凌晨4時開賽）

華倫主帥加利尼維利下台壓力愈來愈大，由12月初上任至今聯賽仲未開齋，但盃賽就一路殺到入4強，踢咗6場西班牙盃比賽取得5勝1和，加利佬仲唔係盃賽專家？睇吓對手係邊隊先講！丙二球隊巴拉卡度、西甲排緊尾二嘅CF格蘭納達、仲有喺聯賽榜排第16位嘅拉斯彭馬斯，華倫有咁嘅成績係應該囉，不過今場對手係「地上最強」巴塞，華倫頂得住冇？

雖然華倫西亞喺轉會窗關閉前從皇家馬德里借得翼鋒卓利舒夫，今場有望趕及上陣，不過呢位25歲球員喺皇馬雪到硬晒，落到場都未必幫到華倫幾多。巴塞今季依然係無敵，其中主場表現更係得人驚，近6主場試過大炒畢爾包6蛋、愛斯賓奴4比1、貝迪斯4比0，上場對住勁暴力嘅馬體會都贏到2比1，今場首回合預料安歷基會派強陣應戰，趁主場之利快啲K.O華倫，免留後患。
美斯踢美洲盃唔玩奧運

華倫今場仲要有前鋒柏高艾卡沙及中場查維富亞高因傷避戰，相反巴塞「MSN」美斯、蘇亞雷斯同尼馬今場均可上陣，有呢個超強組合，巴塞讓2球都照捧！

其中美斯雖然喺上場鬥馬體會畀對方球員一腳跌落左腳膝頭，搞到球王缺席咗一課操練，但主帥安歷基話美斯傷勢並無大礙可以出戰。講開美斯，阿根廷教頭馬天奴就透露美斯將唔會參戰今年嘅巴西奧運，但就會參加今夏嘅美洲國家盃。