韋斯咸主勝派利是

猪拉多纳

領隊比歷長做長有

新一年首次同大家見面，筆者喺度祝大家新年快樂，波運亨通！相信呢兩日大家都逗咗唔少利是，遠在倫敦嘅韋斯咸領隊比歷亦即將收到封大利是，英國《每日鏡報》指「錘仔幫」勁滿意佢今季領軍表現，即將同佢續約5年！咁開心，今晚呢位克羅地亞領隊喺英格蘭足總盃第4圈重賽，主場出戰傷疲盡現嘅利物浦，梗係要砌低對手賀吓，不妨冷敲2.3倍主勝發個新年財。

（開賽時間：周三凌晨3:45）

講起英超今季神奇球隊，大家通常會提起李斯特城，查實韋斯咸今季脫胎換骨表現亦值得一讚。「錘仔幫」季初搵嚟土超比錫達斯教練比歷執教鞭，成績突飛猛進，家陣班波排喺積分榜第6位，大有機會參戰下屆歐洲賽。咁犀利，球會亦準備同呢位47歲領隊續約5年，《每日鏡報》透露比歷上星期二已就續約一事，同班主大衞蘇利雲會面，相信雙方好快可以傾掂數。
今季2勝1和食住紅軍

既然球會咁識做，怕且比歷都會做番啲嘢報答球會，今仗對手利物浦就最啱做祭品。韋斯咸今季可謂紅軍剋星，聯賽雙殺對手之餘，更厲害係連盃賽在內，3戰利物浦取得2勝1和兼且未失1球紀錄，證明班波應付紅軍確有一手。何況前鋒安祖卡路爾復出，以佢嘅衝擊力隨時成為一路奇兵，炸散防線不穩嘅利物浦。
利物浦兵疲防線曳

講番對手利物浦，預計上仗因盲腸炎入院、缺席鬥新特蘭場波嘅領隊高普，今晚都未能趕及復出指揮，影響到隊波臨場應變能力。更大鑊係，紅軍今季4線作戰，偏偏就傷患不絕，一眾球員唔搏到殘至奇。佢哋上仗尾段被新特蘭連入2粒逼和，再上場被李斯特城於下半場2度破門打敗，反映到班人疲態畢露。雪上加霜嘅係，守將史卡迪爾傷勢復發，至少要抖多2個星期，換言之紅軍防線難有即時改善，呢次造訪韋斯咸存在暗湧。