馮諾嘉手記：安御大把在手

纯情小彩迷

　　今日沙田馬場十場賽事，重頭戲有兩場本地一級賽，女皇銀禧盃同埋打吡大賽，戲碼精采，唔少馬房成手馬配合而嚟，務求連場數胡，大家點可以錯過呢！先講第八場打吡大賽2000米，東、方、蔡、摩四大廐一向都對盃賽虎視眈眈，但千祈唔好遺漏排喺練馬師榜下游嘅胡森，皆因佢今次都雙龍出海，有「至勇威龍」同「非常好」列陣，前駒連番入位後，上場打吡預賽喺巫斯義胯下，後上追過今日同場角逐嘅「極品絲綢」、「締造美麗」、「魔法幻影」等惡馬，證明絕對有力再下一城，如果真係由今季成績較差嘅胡廐奪盃，都算係爆冷，馬膽一於揀「至勇威龍」，支持吓胡森。

　　配腳方面，「極品絲綢」今季六戰獲四冠兩亞，實力未見底，韋達一直唔放手，睇佢都好想打破未贏過香港打吡嘅宿命。「勇敢小子」至今六戰未嘗敗績，蔡廐三駒梗係以呢匹馬最具勝望，改配柏寶馬房上下都甚表歡迎，睇吓佢可唔可以創造一季內七連捷嘅紀錄。評分最高嘅「締造美麗」當然唔可以拖漏，在港八戰不勝有位，戴圖理執韁，唔可以睇小。「魔法幻影」來頭唔簡單，初跑呢程都唔可以忽視。

鳥語花香新力勁惡

　　第七場女皇銀禧盃1400米，只得八匹參戰馬，大摩出兩駒都夠晒惡，可以話揸住半邊盃耳嚟跑，用「鳥語花香」做膽，最近跑1200同1600米都只能夠入位，今戰1400米相信最啱佢腳法。配腳先揀「新力勁」，前仗1400米奪冠，上場1200米稍短都跑第二，七歲老馬難得狀態咁弗，相信會盡地一煲。呢場評分最高嘅「再領風騷」當然亦要拖，平磅賽對佢有利，1400米更係首本路程。「友誼至上」跑1400、1600米表現準繩，要兼顧。

　　第九場二班1600米，「安御」上場跑田草1400米，輕鬆贏「好心星」個半馬位，過終點猶有餘力，跑多二百米冇難度，做膽。配腳先拖上場跑第三嘅「朝東之寶」，再揀「按得快」，強配韋達不容忽視。冷門吼「勝利飛駒」，上場輸唔遠，狀態有起色要防。