洪禮賢講馬：奇葩唔簡單

纯情小彩迷

　　近日不論谷草或田草，唔少賽果都扭曲了，以為利內檔，跑落原來唔係。諗住有得追，最終係一放攪掂，所以，近期賽事模式係點，不宜過於着重之前跑道累積的數據，當天的趨向才實際。

重心場次

第4場  第四班（60-40分）1400米

　　奇葩唔報頭場特登加程，氣量掹唔掹到唔知，但初出有本事上名已唔簡單，仲要佢當時發過脾氣，陣上「片」得吓，轉親彎又唔多順，所以最尾只輸頭位，起步分真係着數﹔如果跑完一場乖少少，九檔又唔會令佢陷於極不利處境，有望補中。

　    「蓋世子牙」剛仗發揮如何，大家有眼睇，被動還被動，係咪要咁蝕章，又未必囉﹗今次用到柏寶，正路計會跑高幾多，長直路可能仲啱衝。「金獅猛將」跟了幾場，經常都喺外叠「遊埠」，但又輸近，睇落係跑住等降班，呢次一落班即縮回此程，按近績顯示跑短會更有把握，係時候拿下面具了。「香檳王」上場已有揀，加程即令演出升級，贏開加磅唔多，撞正步速唔快場合，依然有形勢。「強駒」二檔守好位，跑法會賺，但上場連前駒都爆唔贏，位望高啲。「福至心靈」未試過打叠跑相同路程和場地，呢次肯咁做，似乎已搵到出路，而上場出閘受甩腳踏影響，直路又「片」得犀利，仍見追得唔錯，如加配件幫到手或可出冷。

第1場  第四班（60-40分）1200米

　　精密紡剛仗谷草1000米輸近，末段明顯好遲才撻得着，轉場和加程合理，試多兩課閘如引領到進度上升，應可大幅提升戰鬥力。「時時攞彩」開了竅，及加磅唔多，就算轉場也不成問題。

    　「好運精選」出賽多了，漸漸令進度趕上，如此時不似近幾仗咁難穩定早段走勢，沿途留放得順滑，或有突破。「電子金麟」剛仗全程「外遊」，不用計賽績，但見陣中確比初出規矩，如今場執番好跑法，會有不同效果。「好辣椒」和「甜酒」有點失望，最多位置。

第2場  第五班（40-10分）1200米

　　偉感落班便增程，處理夠耐性，表面上，近仗都係有頭冇尾，但唔排除係路程過促的關係，然而陣上走規的確乖了，仲要一場又一場都係咁，所以或因路程問題才未見進步的成效，有冇睇錯佢，今場會有答案吧。

　    「時時有機」與「華忠寶」長期在前列歸來，不妨拖一注。「穩操勝算」縮程可爭，卻不是熱捧對象。「好活力」上場追得勁、「高駿」唔失準會好惡，一對冷門也可考慮。

第3場  第三班（80-60分）1200米

　　傾力之城現階段純粹跑速度都夠殺，唔使用第二把刀住（性能轉為守好位跑法），所以十三檔冇咩好驚，放出不難帶到。

    　「明燈」上場用嚟行頭，贏來比預期更勁，唔好單以勝負距離作據，因當時出彎前柏寶已扣唔住，隻馬自己湧上嚟，發力點係早咗﹔只加兩磅唔覺係咩一回事，但轉回韋達的效果則要計囉﹗「進取」用到留後追跑法，可塑性提高了，呢次檔好或更叻。「超力駒」加罩及縮程有意圖，情況大有廐侶「賀喜」影子，所以不要介意上場衝落冇乜。「朝東飛駒」1400米可能會好啲。

第5場  第四班（60-40分）1600米

　　鵬力洋洋啱啱嗰場加程卻令成績退步，但演繹手法應是主因，全程幾蝕章，返到直路仲有份衝，算隻馬自己本事﹔今場保險章返回此程，檔好和用韋違，統統都係好的轉變。「光芒四射」一郁手贏到對手冇得跑，能力唔簡單。

　    「將軍歡笑」如果上場直路唔係有過阻窒，入Ｑ的過程輕鬆得多，確認前仗唔係符碌之作，只係今場磅位再加有點影響。「吉利多」再遇前兩駒仍不易反先。「勁惑」剛仗那個季軍跑得幾盡吓。「確威星」再加程未必有把握，拖腳唔反對。「魅力心」上場貼完，有甜頭後唔敢再試住。「萬子千紅」閹後會否令情緒變好，要睇臨場。

第6場  第三班（80-60分）1600米

　　天瞳能贏「國寶」、「馬主精英」，此際能力唔係一般同級馬可比，如非一Ｗ收工，唔難再捷。「大家開心」總之唔係準備上有咩問題，在班內中程時刻有影響力。

    　「大將風範」近績呈現穩定性，只要十一檔唔好令騎者過度順其自然處理，話晒前仗才在同程僅僅冇Ｐ，處身此場有權上名。「旺國手」見好一排，只係成績冇寸進，唔知會唔會一換人又得番。「多贏勁駒」前仗閃閃身有追勢，上場直路則一步冇騎過，換來名次大落後，雖然唔排除前仗係霎眼嬌賽績，但呢次隔夜只得十餘倍，有啲聲氣噃﹗「好芝味」一而再陣上追得好，三檔可能更有形勢。

第7場  本地一級賽1400米

　　鳥語花香一馬獨大的格局吧，休出的第二回合，一定鋒利得多。「再領風騷」上季在此廐開始，跑親1400米未輸過，如今場冇乜步速，放返嚟有咩奇﹗

　　「友誼至上」造出今季最快1600米時間贏董事盃，夠晒說服力，縮回此程也無不可。「新力勁」當弗，級數則稍遜。

第8場  本地一級賽2000米

　　極品絲綢係幾匹實力馬之中，值博率最高一駒，論能力唔覺比下去，坦白說，係驚韋達點發揮（上場明顯係早發力及出彎外咗）。「締造美麗」二檔唔會冇形勢幫手。

    　「勇敢小子」換人可能出現大躍進。「君子一言」從未跳出1400米框框，首次涉足就係咁高水準場合，有點失利。「至勇威龍」四平八穩。「魔法幻影」唔知點解咁熱，亦唔知咩原因之前試閘走勢唔好，但單睇兩役表現，今場2000米會更叻。

第9場  第二班（100-80分）1600米

　　朝東之寶和「安御」俱有power，但又唔係冇挑剔地方，前駒檔曳及重磅，後駒點都係初跑此程嘛。

    　「一團威」曾受感染，但工夫流程冇影響，檔靚更易掌握形勢。「漂亮第一」此程唔會比長途好。「利好」連續兩場有番走勢（上場直路阻到揪起），臨場亦見神色好番，如非叠埋心水等落班，有冷腳機會。「按得快」已講過此程冇1400米咁好跑，最多「披士」。

第10場  第三班（80-60分）1400米

　　歡呼星冇咗「雅雪」在場，壓力全消，贏唔贏得晒唔敢講，但入三甲成數好大。「沙貝利」用番韋達會跑低啲，尊重新勝賽績則可拖。

    　「聖河」一再失望，但上班負輕磅可能唔同。「海王子」檔好令競爭力大增。「飛快勇」勿因往績波動而輕視，計進程應到目標了。「祥勝愛駒」和「勝利旋峰」半冷拖一注亦可。