墨城大顯「威」風

猪拉多纳

反潮流係咪都攻

現代足球愈嚟愈重視防守，唔少球隊為咗令成績有保障，放棄不停進攻取悅球迷。不過墨爾本城今季高舉進攻大旗，球隊亦順理成章成為聯賽入波王，呢鋪佢哋作客防守唔多掂嘅威靈頓鳳凰，相信會整多次入球騷畀大家欣賞，就算呢鋪入球中位數升至3.5球，1.8倍入球大照樣捧得過。（有線64及203周五下午2:30直播）
墨爾本城場均入2.5球

墨爾本城入波易過食生菜，皆因無論對手係強係弱，主場定作客，佢哋都會堅持大踢進攻足球。結果呢班波喺今季出戰20場聯賽，足足攻入50球，場均入到2.5球堅得人驚。

大舉進攻嘅代價自然防守欠穩定，所以墨爾本城今季只得1場清白身，名副其實入得又失得。雖然今仗入球中位數升到3.5球，不過捧場客又唔使太擔心，事關墨爾本城最近13場聯賽，有11仗總入球數字係多過4球嘅，何況首席射手科拿路利腳風勁順，近5仗攻入5球。考慮到班波連續4場作客不勝，與其捧佢哋贏波不如直接撐大盤仲穩陣囉。
鳳凰近6場入10粒

至於對手威靈頓鳳凰狀態低沉，近11場比賽僅得1場勝仗，近6場比賽一共失咗15粒，你叫班波呢次點頂得住墨爾本城強大鋒力先？好在鳳凰火力都唔曳得去邊，喺呢6場比賽一共攻入對方10球，射手比歷克包維亦交到貨包辦當中5粒。橫睇掂睇今場都係一副駁火格局，球迷買定花生等睇大騷都得咯。