飛腳鹿角首騷大事慶祝

猪拉多纳

日職今日上演首輪壓軸戰，由兩支名牌球隊交鋒，大阪飛腳主場迎戰上季次階段表現出色嘅鹿島鹿角。飛腳同鹿角兩隊火力都猛，加上近5次交手有4場開大盤，阿謙推介1.7倍大球大。

（有線61及201台周日下午1時05分直播）

飛腳早前喺日超盃不敵廣島三箭後，上周三亞冠盃作客亦只以0比0打和南韓球隊水原藍翼，似乎未上力。不過前線鐵三角宇佐美貴史、安達臣柏德列及由聖保羅外借嘅前鋒艾迪美臣巴拉加夠質素，加上過去7季聯賽首戰有6場開大盤，擺明鍾意開季即搶。
兩軍近5交鋒4開大

鹿角上季喺石井正忠接手後踢出充滿侵略性嘅風格，球隊今季雖有主力射手達維離隊，但勝在進攻點多，好似卡奧盧卡斯、遠藤康及原本已離隊但其後決定重新加盟嘅前鋒金崎夢生都有入球能力。鹿角今仗雖有中場柴崎岳及後衞黃錫鎬缺陣，但球隊去年聯賽首、次階段同2014年聯賽首戰都開出入球大，加上兩軍近5次交手有4次開大盤，今場一於繼續追大！