紅魔客W堅有計

猪拉多纳

紅魔「福」星高照冇有怕！今晚英超壓軸尾場曼聯作客西布朗，紅魔主帥尹戈爾今季多次瀕臨被炒邊緣，尤其係近期傷兵滿營下，佢獨具慧眼識珠，發掘出新仔拉舒福特，「福仔」近3仗入4粒真係行運一條龍，令「方丈」再次逃過下課一劫，食住各項賽事4連勝嘅氣勢，今仗作客西布朗有力再下一城，客勝有計。

(now 621周一凌晨零時直播)
方丈續靠「福仔」食胡

曼聯季中開始傷兵門問題不絕，特別係朗尼及安東尼馬迪爾兩大射手齊齊打柴，球隊搵個似樣啲前鋒都冇，大家都以為主帥尹戈爾大限將至，點知「方丈」喺青年軍搵個新仔拉舒福特頂住檔，竟然時勢造英雄，「福仔」接連於歐霸對米迪蘭特、聯賽對阿仙奴均梅開二度，尤其對阿仙奴之役，個人貢獻兩入球一助攻，協助曼聯贏3比2成為英雄，亦令對面倒戈嘅紅魔師兄韋碧克相形見絀，雖然佢上周中快車對屈福特並冇進帳，但紅魔依然於末段由桑馬達入波奠勝堅有運，證明「福仔」真係帶旺成隊波，尹戈爾果然命不該絕。

曼聯唔單止全面復甦，連帶一眾傷兵亦差唔多陸續康復，安東尼馬迪爾上周中已傷愈復出，賽前消息話基斯史摩寧亦有望候命，費蘭尼、路爾斯華倫西亞亦好得七七八八。喺「福」星高照下，紅魔連盃賽已豪取4連勝，信心爆棚，依家佢哋已追到同「4哥」曼城同分，要殺上前4爭取下屆歐聯入場券絕對不是夢。
西布朗鋒力唔多掂

西布朗近3場聯賽取得7分，與安全線甩開咗12分，令佢哋護級壓力大減。不過，佢哋由開季至今28戰只入得29球，平均每場只入得1粒咁大把，單靠荷西朗頓及比拉希奴數胡，攻力咁弱唔多靠得住，今晚迎戰行運一條龍嘅曼聯好難頂得住，客勝有1.83倍值得捧場。