馮諾嘉手記：清新空氣 試準開胡

纯情小彩迷

　　周三晚對姚本輝嚟講真係有喜有悲，本來起孖高高興興，可惜「蓮華生輝」健康突然出咗問題，未能按原訂計劃坐飛機遠征日本，角逐三月廿八日喺中京競馬場舉行嘅高松宮紀念，話說「蓮華生輝」同「極奇妙」上機之後，「蓮華生輝」突然出現輕微絞腸痧，結果連「極奇妙」都要即時返回沙田馬場，要獸醫即時幫佢做手術。睇嚟今次亦唔算小兒科，小妹雖然對呢種病症唔係咁了解，但睇番以往做過類似手術嘅馬，就算痊愈亦好難回復昔日狀態，有關詳情仲要等練馬師姚本輝再作透露。

　　其實馬房之前已經試過打算安排「蓮華生輝」遠征日本，但連續兩年未能如願成行，匹馬更曾因為腳患一度狀態低沉，上季初三戰未能贏馬，當時唔少人認為佢嘅狀態難復盛時勇銳，可能已走到競賽生涯嘅尾聲，但練者並無放棄，之後遠征新加坡，成功奪盃為港增光，今季六歲之齡仲喺國際賽輕鬆贏得香港短途錦標，之後又喺三冠短途系列頭兩關大熱勝出，由於時間短促，馬主冼鏡煜同練馬師商量過後，決定放棄尾關女皇銀禧紀念盃，選擇遠征獎金較高嘅日本高松宮紀念，估唔到今次又遇傷病阻撓，似乎真係無緣遠征日本，但以一匹贏過十五場賽事，包括多項級際賽嘅馬王嚟講，早已交足功課有餘。

盈彩繽紛三連霸

　　周日沙田十場賽事，追捧兩匹韋達嘅坐騎，第三場三班1200米，當然係支持兩出兩捷嘅「盈彩繽紛」，兩次贏馬都以個幾馬位彈甩對手，上場同程贏來猶有餘力，今場爭三連霸，應該唔成問題。

　　第四場四班1200米，「清新空氣」上場初出小妹已經睇好，並推薦畀大家，睇佢埋門捧成只有2.4倍大熱，就知有人信心十足，最後走位唔暢順下跑梗頸四，實際只輸頭馬個幾馬位，熱身兼試準後，今場跑長啲抽二檔有利，係時候贏馬開齋。