紅軍歎「曼」板博半和啱數

猪拉多纳

揸住兩粒 唔同你急

歐霸盃16強次回合上演英超雙紅會後半Part，利物浦作客再鬥曼聯。紅軍首回合以2:0技術性擊倒紅魔，今仗只要唔輸便可殺入8強，紅軍喺今屆歐霸盃賽事未輸過，而且4仗作客未試過喺上半場失守，全部打和0:0，後防堅固。與此同時紅魔今季主場表現勁慢熱，怕且雙方上半場都幾難有貨交，2倍半場和值得一試。

（now670周五凌晨4:05直播）

雖然話利物浦喺首回合贏波說服力十足，之不過佢哋喺再上5鋪對住由尹戈爾領軍嘅紅魔全數落敗，相信高普今仗都唔敢掉以輕心，刻意追求雙殺紅魔，反而為求出線會穩打穩紮。睇番紅軍喺今屆歐霸盃9戰不敗，而且4場作客都未曾喺換邊前失守，可見佢哋防線非常穩健。
紅軍歐霸客戰勁守得

事實上，高普執教初期紅軍防線表現唔算突出，但喺呢位經驗豐富嘅主帥慢慢指導下，一眾後防球員均有進步。利物浦喺最近11場比賽入面，足足有10仗喺上半場零封對手。再者紅軍自從喺英聯盃決賽不敵曼城屈居亞軍，佢哋迅速重返正軌累積3連勝，狀態、信心同樣處於高峰，想頂住曼聯半場唔輸唔算係咩難事。
曼聯主場成日食白果

更重要嘅係，曼聯今季喺奧脫福球場失去過往嘅震懾力，近16戰主場出擊，竟然有13鋪喺上半場食白果。就算喺有斬獲嗰3場波入面，亦有1場係靠對手擺烏龍送禮，先可以追和返入更衣室，可想而知紅魔鋒力幾咁疲弱。

再加上經驗十足嘅射手朗尼繼續養傷，尹帥想憑住安東尼馬迪爾、拉舒福特等小將，早早攻破紅軍大門實非易事。咪忘記利物浦仲要喺踢完首回合後並冇賽事，比起周日仲要踢足總盃嘅紅魔有更多時間備戰同休息，以逸待勞下更有力瓦解曼聯攻勢，咁睇法換邊前想有波入並唔容易。