比利時盃決戰撐標準列治

猪拉多纳

比利時盃決賽今晚爆發，比甲常規賽冠軍布魯日同只排第7嘅標準列治爭霸，布魯日雖喺牌面上稍佔優勢，但佢哋離開主場表現就大打折扣，相反標準列治喺聯賽徹底失敗後，視今仗為全季成敗關鍵戰，決心更勝布魯日一籌，Anton決定信多佢哋一次，標準列治有受讓之利，推介1.72倍讓球客勝。

（周日晚11時開賽）
布魯日離開主場就腳軟

今場決戰安排喺中立場比利時首都布魯塞爾嘅博杜安國王球場上演，45,000門票早已沽清，除咗預留4,000門票畀足總同埋贊助商Crocky外，其餘門票由雙方瓜分，兩軍球迷各有20,500門票，絕對公平。布魯日以衞冕身分參戰，球隊喺比甲常規賽強勢奪標，賽前備受各方睇好，不過要留意係佢哋一向喺自己地頭至有超班表現，離開主場就差好遠，今季喺比甲常規賽15場作客賽事輸咗7場，落敗率近一半，實在靠唔住。

Anton一直認為標準列治擁有比甲一線實力，陣中擁有西班牙門將域陀華迪斯、法國中場泰比爾、多哥中場馬菲奧杜斯維同巴西鋒將艾美臣祖利亞等有能力改變戰局嘅球員，計實力並唔輸蝕。佢哋喺比甲表現不穩，主因為經常喺弱旅身上失分，佢哋最後一場聯賽喺晨早踢少個下不敵梅赫倫，無緣前6名季後賽，對球隊收入損失慘重，賽後全隊都視今仗為生死戰，力圖捧盃搶一個下屆歐霸盃席位，否則今個球季對佢哋嚟講已經結束，喺超強戰意下足以同布魯日一拚。