馬主論戰：松風收復失地

纯情小彩迷

　　姚本輝剛啱憑「經典能量」同「寶成智星」起孖兼捧盃，既然搏殺手風順，今次當然繼續吼實佢手馬，最啱心水係第六場「松風」，以往八戰1400米獲兩冠兩亞，入Q率達五成，上仗響同程亦只不過以短頭位輸畀「香檳王」，今次排四檔更啱佢放，應讓可以贏番一仗。

　　另一匹要留意嘅姚廐馬係頭場「飛魚駿王」，初出熱身一仗後，上場再跑直路賽即刻上名，證明質素唔曳，今次對手大多似是而非，有望打開勝門。

（梁廷鏘）

松風威海歡騰值博

　　今日我鍾意第三場「威海歡騰」，前仗響田草1200米同「盈彩繽紛」串Q，若非薛寶力響末段跌鞭，隨時可以跑得更近。今次兩駒再遇，「威海歡騰」由讓「盈彩繽紛」四磅，變為受讓五磅，而且排埋三檔好位起步，計落唔係冇能力反先，一於博佢。

　　另一匹心水係尾場「千江映月」，初出已經響田草1200米上名，質素一定唔差，上場再跑此程姍姍來遲得第四，落腳似乎已經轉慢，今次增程跑1400米絕對係明智之舉，出頭在望。

（張敬山）

正歡騰捧盃

　　告東尼今日手馬幾強，不妨從中揀選捧場對象，最鍾意第九場「正歡騰」，前仗響谷草1800米爆冷贏馬，上仗增程跑谷草2200米一樣跑得好，證明絕非靠符碌，今次轉嚟跑田草1800米，吼準中大校友會盃報名，肯定志不在小，有望捧盃而回。

　　另外，第六場嘅「旅遊大亨」亦唔能夠睇小，前仗久休復出都能夠上名，證明響四班一定有着數，上場跑1400米冇表現，賽後被驗出氣管有痰，敗績唔能夠作準，今次再跑呢項路程，值得吼實。

（任達華）