獅吼火力全開 悉玩必揀大

猪拉多纳

常規賽轉入直路場場搏命

澳職常規賽已轉入最後直路，爭標形勢依然緊湊，今日下午重頭戲係布里斯班獅吼主場火併FC悉尼。目前「3哥」獅吼只差打多1場嘅榜首西悉尼流浪者1分，要後上奪冠唔係冇可能，況且近10仗聯賽全部開大，獅吼為爭逐常規賽冠軍，今仗一定火力全開爭勝，至於FC悉尼仍在力爭季後賽席位，亦唔會坐以待斃，就算中位數調至2.5/3球都照揀大盤。

(有線64及203台周六下午4時30分直播)
占美麥卡倫 近8仗入10球

由於澳職常規賽冠軍，可取得下屆亞冠分組賽入場券，因此各隊都搏甩髀。不妨睇吓積分榜，西悉尼流浪者雖位列榜首，但喺打多1場下，只係領先緊隨其後嘅墨爾本城同布里斯班獅吼1分，後兩隊仍有後上封王嘅機會，尤其係獅吼，上仗作客1比3反輸畀墨爾本城而失去「1哥」位堅唔抵，吸取教訓後唔會再犯錯。獅吼最強武器係進攻，淨係前鋒占美麥卡倫，近8仗共轟入10粒，腳風順到冇朋友，聯同柏拉杜斯、諾夫等拍檔輪流發威，火力強勁。獅吼近10仗聯賽全開大，每仗總入球至少有3球，其中9仗總入球達4球或以上，如單計主場近4仗就攻入咗14球，取得3勝1和，絕對唔係嘢小。
FC悉尼爭前6 有前冇後

另一邊廂，位列第7位嘅FC悉尼，仍有機會爭入前6打季後賽，今仗絕對唔會Hea踢，但上仗作客包尾嘅中岸水手一度兩粒下，竟喺完場前4分鐘內連失2球被逼和2比2，明顯防線唔多掂。話說回來，獅吼亦有中場麥特麥基獲補選入澳洲國家隊踢世盃外，冇咗呢位隊長殿後做搶截，隨時令有前冇後嘅獅吼暴露更多空位，加上今仗雙方均有明確搶分目標，似係鬥攻格局，捧大盤好過。