比利時+1剝牙

猪拉多纳

另一場熱身賽戲碼葡萄牙主場鬥比利時。比利時雖然缺少受傷嘅夏薩特、奇雲迪布尼及高柏尼等主力，不過佢哋勝在夠兵源，加上近年對熱身賽態度認真，連贏7場包括擊敗瑞典、法國及意大利等勁旅，表現有保證。葡萄牙上仗有C朗射失12碼不敵保加利亞，而且C朗勢必留力應付周末皇馬對巴塞嘅西甲國家打吡，比利時受讓必捧讓球客勝。

（now 632周三凌晨2時45分直播）
比軍近7場熱身賽全勝

今場比賽原本安排喺比利時布魯塞爾舉行，不過因為上周當地發生恐襲，最終決定移師葡萄牙利亞拿舉行。比利時今次點兵唔齊腳，中場夏薩特、奇雲迪布尼、中堅高柏尼、維頓漢、艾達韋列特及前鋒賓迪基全部因傷缺陣，好在比利時近年人才輩出，陣中仲有盧卡古、米拿拉斯、迪比利、費蘭尼及韋素等好手壓陣，戰鬥力仍在。球隊近7場熱身賽全勝，對手包括意大利、法國、瑞典及冰島4支決賽周隊伍，唔使擔心佢哋「揸流攤」。

葡萄牙近3場熱身賽只係贏過弱旅盧森堡，表現唔標青，佢哋向來要靠C朗拿度單天保至尊，不過呢名王牌近況麻麻，上場對保加利亞仲輸失12碼連累球隊輸0比1，嚟緊周末皇馬會喺西甲作客鬥巴塞隆拿，就算C朗今仗上陣亦難免有顧忌，難贏如日方中嘅比利時。