馮諾嘉手記：大智慧蝕得起

纯情小彩迷

　　今晚沙田賽事冇盃賽，加上以往全泥宴一直無乜吸引力，而唔少馬主、馬迷都嫌沙田馬場唔就腳，鍾意睇現場嘅朋友，亦話泥地賽道離看台太遠，可觀程度大減，不如留喺屋企睇電視直播。

　　心水馬喺晒三寶場次，第六場三班1200米，用「大智慧」做膽，近仗愈跑愈進步，加咗眼罩後表現更穩定，前仗喺三班跑同程一放到底，大勝對手成三個半馬位，上場挑戰一班賽，雖然畀頭馬「電光能源」拋離，但係佢都贏第三名嘅「新力高」成兩個馬位，證明有一班級數，今場回師三班當堂惡晒，呢場放頭馬唔多，預期四檔嘅「自家威」會放，十二檔嘅「大智慧」亦會搶前，憑超班實力，蝕位亦讓得起對手有餘。「自家威」泥地1200米一向耍家，同程季內獲兩冠一亞，配腳首選。拖埋「光輝出擊」同「眾威旺」，前駒上場跑田草1200米雖然落敗，實際只輸個幾馬位，今次初跑泥地求開齋，或有令人驚喜演出。後駒大前仗後上贏泥地1200米，今場抽外檔，後上馬冇乜影響，回師勝途要留神。

百贏萬歲搵到出路

　　第七場三班1650米，「百贏萬歲」近三仗轉戰泥地賽，表現進步，上場更喺巫斯義胯下奪冠，乘勇再戰求連捷，可以做膽。配腳先揀「善戰」，今季專攻泥地，一月中嗰場1200米後上追勢勁，只係直路太遲撻着，最後只得第四，上場轉戰一哩，直路上又有強勁走勢，跑第四只距頭馬兩個零馬位，試準晒再戰，千祈咪睇小。「人緣好馬」上次與「百贏萬歲」同場排三檔，後追只輸對手半個馬位，尾段造快時間，但今次要克服十一檔，惟有作配。「和諧大使」谷草一哩表現最好，呢次初跑田泥求突破，有一檔之利，不妨冷敲。

　　第八場一班1650米，馬膽「千杯不醉」，季內三戰同程唔贏都有位置，奪冠嗰場都係跑泥地夜馬，有晒經驗可再接再厲。配腳方面，先拖上場泥地1200米跑第三嘅「新力高」，「貝利高」轉蘇廐後愈跑愈近，強配韋達跑泥地求交代，要吼，「鷹闖」前仗同程跑第二，亦要兼顧。