|
上期韋達騎師王賠率在隔夜及開賽前，一直企硬十幾蚊，結果未跑到尾場已提早封王。呢次輪到柏寶有相同情況，佢又係得１點幾倍，同其他賠率較為接近嘅騎師都有好大差距，睇嚟全泥宴到番佢威嘞﹗
重心場次
第4場 第四班（60-40分） 1650米
天寶之威處身戰鬥力最強時段，若不，唔可能連續兩仗克服到轉場問題（初跑），現時留在此班點都高啲，如非今場完全唔利追，有權再Ｗ。
「駕馭」泥地短途一樣輸近，如果唔係直路阻完又阻，應該更有威脅，今場回到一哩又用番老拍檔，仲要排埋好位，整體條件唔錯。「爆發力」劣檔曾跑得好，唔擔心11檔影響過巨，始終季內未贏，唔應該手軟。
「金獅猛將」上場落班僅得殿軍稍失望，但有可能係沿途跟前咗多少，呢次寧重磅也用韋達，可以畀多次機會。
「馬有成」早前試閘贏得好輕鬆，但又一次排外檔，唔知早段際遇會點，限拖腳。「共同努力」明顯上場1800米係嫌長，如果唔係拉士200米唔會頂唔住，縮回一哩應好，但同父馬在泥地成績麻麻，限敲。「瀟灑財星」同場冇馬走，形勢啱晒佢，有埋1檔仲正，最睇唔透。
第1場 第五班（40-10分）1200米
實在好五班勁旅，一落班即用柏寶，又肯叠埋心水等此程，心意擺到明，如6檔不致早段好蝕，不勝有位。「贏啲啲」一課又一課大閘係咁省，尤其最近一課泥閘後追勢勁，轉場唔似博博吓。
「智勝寶」按季初同程入Ｑ水準放在此場，跑得番八成已夠入圍。「勁多勝」落班才在配件上作變動，或許係後着，唔排除突然變身，始終係曾經令人憧憬之馬。「祝福滿滿」12檔未必克服唔到，因今場早段唔係好多馬會快，泊到位就有機。
第2場 第四班（60-40分）1200米
風陵渡置身一場類似條件賽場合，本身又不用負重，形勢幾着數，再者，過去佢3次在班內此程上陣冇Ｗ有Ｑ，地位可知。
「馬皇帝」前仗初出跑同程，處理手法蝕章、被動及滋油，一樣得第四，大抵已露過一手，隔一隔又返泥，執番正跑法，唔難有三甲。
「奄尖大少」唔鍾意上賽沿途的擺位，才令拉士衝唔起，換雄仔效果可能更好。「實業輝煌」剛仗後追居然有兩腳，看來分數已減過籠，用小將如肯擺番前走，隨時唔同晒。
「寰采商人」上場太差，但有底質及好檔﹔「八發八中」剛仗落班表現只中規中矩，不過評分減得算快，一對馬有賠率可拖一注。
第3場 第四班（60-40分）1800米
友誼奧運大致上近績幾好，排好檔更可配合其守好位跑法，正路之選。「金球」近仗不論跑咩場地和路程，總會湧到一段，呢次回到季內唯一贏馬路程，點都跑高多少。
「雙妙星」唔明點解近兩仗輸得咁難睇，不過，落班係有優勢，難得吸引到韋達（人馬合作10次得4W4P），希望跑得番。「招財名駒」跑泥地就算檔位形勢差啲也有能力應付，加上佢係今場少數有往績支持嘅馬，有分頭拖住冇錯。「稻庭烏冬」剛仗跑法冇大錯，但直路完全冇得衝係失望，加程則會幫到，不過信心談不上。「廣友名駒」連續兩場冇影，或已回夠氣。
第5場 第三班（80-60分）1200米
一定快連贏3場此程，冇咩好拗頸，目前負磅仍不算吃力，機會依然。「歡樂出擊」前仗入Ｑ之前已曾試泥閘而跑得好，既然肯作嘗試，未必係壞事，總之計馬冇理由三班冇得贏。
「金獅駿將」做番幾多嘢至跑，睇準備似係今場，忽然用韋達也正面。「勁飛馳」路程和場地不斷轉，究竟係仍處於靠撞階段，還是分數未減夠，真係唔知﹖﹗但經常可爆一段之馬，今場只負107磅，咩都有可能發生。「浚鋒天河」季內甚少輸遠，而本身泥地性能唔應該差，防爆。「全德勝」全無穩定性可言，但隔夜突然有飛。
第6場 第三班（85-60分）1200米
自家威同程能與「一定快」串Ｑ，負輕磅在此唔會冇得鍊，預期4檔唔難放出，能否放到則要視乎有冇對手唔生性鬥燒，正常發揮應有三甲。「大智慧」唔係12檔應是膽材，尚幸今場唔算多馬放，希望早段有機會泊到二叠，咁就有勝望。
「眾威旺」如受惠步速快，隨時一條直路掃晒。「星火燎原」試閘係威係勢，但終究是初跑泥地，限拖。「光輝出擊」落到三班惡到痺，只考慮場地性能。
第7場 第三班（85-60分）1650米
百贏萬歲重磅唔使擔心，而同場好多馬於上賽輸過畀佢，只要唔係體力回唔切，仍具勝望。「人緣好馬」及「善戰」能力差唔多，性能亦齊齊轉到中程了，如呢次陣上演繹得好唔難入圍。
「穿針引線」近仗輸得好恐怖，難寄望突然好番。「銀太陽」情況一模一樣。「和諧大使」初跑泥地唔知得唔得，不過早前泥閘走勢及格有餘。「皇馬」及「新強勁」買Ｆ可拖埋。
第8場 第一班（110-85分）1650米
千杯不醉和「貝利高」同程曾以快時間串Ｑ，對於兩駒的能力放心，加上磅唔重，檔位唔係唔好，俱有爭勝機會，尤其前駒，因好大可能遇到利追的環境。「加州滿意」一再試泥閘有走勢，加上血統背景及前仗走勢，加程或試出彩虹。「新力高」剛仗那個Ｐ冇甚說服力。「鷹闖」排好位，處境與前一場差唔多。「創佳績」長期演出準，拖住冇錯。「齊喝采」冇濕泥應該唔得啩﹗﹖ | 
金睛卡
发表于 2010-3-24 10:32
变色卡
显身卡