賠率有路捉：贏啲啲票勁贏得

纯情小彩迷

　　頭場五班1200米，梁定華嘅「贏啲啲」早飛居然係35蚊大熱W，而P亦係14蚊次熱，賠率仲熱過同程好手兼有柏寶壓陣嘅「實在好」、同埋韋達主轡嘅「祝福滿滿」，真係始料不及，一來隻馬十七戰未勝，二來冇泥地根據，仲要最近谷中一哩都追唔切，跑短途何德何能成為大熱呀﹖不過睇番練馬師今季曾經部署過同父「博利好」喺呢程開齋，證明血統啱泥地，既然有強勁早飛支持，千祈咪睇小。

馬皇帝愈熱愈穩陣

　　第二場「馬皇帝」喺香港兩戰都已經有飛，分別係9.9同4倍，證明一早有人睇好佢嘅質素。噚日早飛仲犀利，WP都係大熱門，34蚊W，14蚊P，睇個款好似實食冇黐牙咁。留意此駒初出一役已經係泥地小試牛刀追入第四，隔一場後今晚回師泥地，應該係交代時機，而睇番文家良同柏寶今季合作過五匹大熱，取得三W一P，如果「馬皇帝」臨場仍然企硬係大熱門的話，可以放心捧場。

蔡明紹博冷

　　騎師王方面，雖然近十三次沙田賽事，韋達十二次做騎師王，不過今晚係全泥夜賽，唔可以咁計，何況賠率太好分，唔似樣。柏寶手馬固然惡，但衰在冇得分，既然蔡明紹有「一定快」，加埋「稻庭烏冬」、「皇馬」同「加州滿意」都有機會，有分頭值得小注玩吓。

周仲