球員爭上位 比利時半場攞威

猪拉多纳

比利時被捧為今屆歐國盃熱門之一，呢支「歐洲紅魔」今晚喺主場友賽挪威，為出征法國前作最後練兵。比利時中前場幾乎每個位置競爭激烈，球員為攞正選，就算友賽都會爭取表現，唔需要擔心大賽前留力嘅問題，今仗有望半場搞掂挪威，半場主勝可取。

比利時上仗熱身賽同芬蘭踢成1比1，但其實全場射門多達17次，未能贏波欠啲運，但係睇得出夏薩特、奇雲迪布尼、盧卡古同奧歷治組成嘅鋒線狀態唔錯，加上踢完歐聯決賽嘅恩歷克卡拉斯高歸隊，火力有增無減，今仗可望喺征法前贏波。

挪威喺附加賽飲恨，冇份踢歐國盃，戰鬥力唔算太弱，不過球隊依家進入重建期，表現難免飄忽，加上作客表現令人失望，對上4仗作客賽事只係1和3負，包括上周慘吞葡萄牙3蛋，面對一班爭上位嘅「歐洲紅魔」，相信半場都好難頂得住。

（now 632周一凌晨零時直播）