洪禮賢講馬：泊位與誠意唔少得

纯情小彩迷

　　做直播節目要有個人立場，不能評鑑任何馬匹也模稜兩可，介乎得與唔得之間，就算最終結果與推測有出入，一旦支支吾吾，做落會對唔住自己之餘，唔畀人投訴至奇，但另一方面，又不能投放太多個人情感落去，因為如果自己買咗嘅馬搏輸了，由於火遮眼關係，可能一切責任也推諉在騎師身上，便會以偏概全，所以平常心好緊要。坦白說，經過剛賽睇到兩匹馬跑落真係唔對勁，如果唔係做緊節目，XYZ可能已經爆晒出嚟（其實當時心裡已不斷重複了幾句）。

　　主人翁係「祥禎」和「同心威駿」，咁啱兩匹都係該場大熱門，又係啱啱贏完嘅馬，相信上了寶貴的一課嘅馬友，應該唔只得我一個。前駒沿途擺位見到眼冤，一如賽後報告所指，騎師在早段應更努力匿在「威振神駒」後面攞遮擋，而唔係任由坐騎在三叠望空置前，待至直路隻馬根本已冇晒力。事實上，今場在跑法上已與上場完全不一樣，就算路程和排檔有別（上場8檔起步），跑法也不致差咁遠，就係咁，呢匹新勝馬以第十名過終點，睇完仲唔呆晒﹗

同心威駿「舉手投降」

　　及至「同心威駿」一場，情況大同小異，冇錯，此駒5檔出閘係唔夠銳利，但昌哥只係喺早段騎咗幾步，之後就畀10檔嘅「永利多」在外側泊到埋二叠的第二位，而佢自己卻在三叠望空唔上唔落（中程仲要四叠），基本上，一匹跑開速度嘅馬，咁樣發揮點會有表現，如果有得揀，我寧願昌哥攞咗「永利多」個位，睇吓與「勝在分秒」互片，放到去邊都好，起碼曾經有誠意去爭取機會，而唔係跑完早段已舉手投降，你哋話係咪先﹖﹗