馮諾嘉手記：信韋達追月

魑魅魍魉

　　今晚快活谷八場賽事，採用C+3欄C+6彎跑道，內檔馬當然較着數，不過，上次跑呢條賽道，檔位形勢唔係一面倒，內、外檔同樣有馬贏，但最特別係無論跑短途抑或長途，有成五場頭馬都係由頭放到尾，所以今次唔單止要留意檔位，仲要睇吓邊匹馬前速夠快。

　　心水場次第四場四班一哩，用「十足十」做膽，上場同程又跑第二，仲未開齋，乘勇再戰求補中。配腳先拖上場1200米奪冠，今次增程跑一哩嘅「七星仔」，其次係抽得黃金一檔嘅「萬人迷」，最後係季內贏過同程，今場強配柏寶嘅「福到多多」。

團隊精神跑番短途掂

　　第七場三班1200米，「團隊精神」一向跑短途1000、1200米表現最好，上場初次增程一哩招敗，唔可以作準，今仗回師贏馬路程，隨即強配韋達，加上排一檔相當好跑，形勢咁有利，做膽。配腳方面，「駿蹄飛」至今只跑過五場，雖然未嘗入位，但上場初次轉戰谷草同程，喺杜利萊胯下跑第五，只輸個幾馬位，走勢有進步。「開心好多」季內跑過多場田草都無功而回，上場回師谷草求突破，結果輸亦接近，要拖。「超勝」前仗跑同程只係以頸位輸畀「質超駒」，季內已四度屈居第二，為破悶局實好鬥志，要兼顧。

　　第八場三班一哩，馬膽「追月」，對上五場全入前四名，可惜未嘗一勝，今場抽到二檔，加上放頭馬唔多，預期「寶成智星」會領放，「追月」出閘後即可貼欄守好位，跟喺「寶成智星」之後，形勢有利，韋達唔放手，相信佢嘅眼光，不妨追多次。配腳首選「超新星」，上場排大外檔起步，最後亦只係輸頭馬個半馬位得第四，今場檔位內移好跑得多。「馬風雲」已經接近兩季冇贏過馬，馬房實有壓力，近兩場跑泥地都排外檔而敗，但大前仗跑同程得第三，證明仲有戰鬥力，今場抽到黃金一檔，有權入三甲，要拖。「寶成智星」上場跑同程贏得輕鬆，今場冇乜快馬，唔贏都應該有位置。