洪禮賢講馬：機緣滙聚重磅讓得起

魑魅魍魉

　　唔想提韋達都唔得，目前追到柏寶氣咳，相差４Ｗ而已，今晚又騎足咁多場，唔知可唔可以再拉近啲，但見佢隔夜騎師王賠率得16皮，睇嚟都係數胡格﹗而呢期幾位小將各有冷嘢，賽果未必會正正常常。

重心場次

第5場  第四班（60-40分）1200米

　　欖球樂園由出道初期慢閘、情緒唔好、走規唔順等毛病，到近仗喼住有好成績交出，明顯進度逐漸轉好﹔上場只係打了兩吓膊頭就贏，姿態極輕易，如果唔係132磅拖垮，不難再Ｗ。

    　「鉅業光輝」臨場情緒愈見好，而上場如果唔係直路被他駒外斜影響，一定衝得更勁，既然11檔都有Ｐ，呢次２檔必更好跑。「太陽昇」剛仗成為今季接近70場同程最慢頭馬，水準談不上，惟呢場又冇明顯放頭馬，或者又撈到油水。「百利旺」啱啱嗰場又追得靚，會唔會忽然冇影（一如季初輸近之後），呢點真係唔知，但今場實際要過的關唔多，未必縮槓。

  　  「神力金剛」最睇唔透，前仗同程慢閘追得好，上場在外叠也塞車，但又輸近，嘗試加配件或會好（剛仗直路在操控上未完善），有埋內檔隨時變身。

    　餘駒之中，「源活海」及「揀得準」分利，卻冇邊場跑得好過。

第1場  第五班（40-10分）2200米

　　康樂名駒轉倉成功重生，贏來輕鬆，加程只會更好，如非一招了，目前負磅唔重，不難再Ｗ。「兄弟班」如非上賽直路要兜入兜出，可能有Ｐ了，而此程唔擔心掹不到，加上轉到韋達手上，應有更佳發揮。

　　「飛躍星河」四平八穩，只係略嫌賠率過熱。「百笑」唔明點解上場一步都冇，加上佢向來重戴眼罩都冇好過，唔敢「以身試法」。「森淼盛」上場因形勢拖垮，始終之前路短也得ＷＱ，呢次路合應有本事上名。「足球大師」五班着數，「活威小子」亦然，冷敲。

第2場  第四班（60-40分）1000米

　　威威財星轉倉後明顯在身型起了變化，估計內藏已久的能力會得到釋放，６檔要放唔難，轉馬房首場有機會即省靚招牌。「勁爆力」和「巧奪天工」贏點班次，惜沒有任何保證。

    　「原小子」剛仗末段話冇就冇的走勢很失望。「勁勇士」上場只因選擇發力點出錯才名次稍後，但呢次12檔唔知又會點。「勝利金剛」無端端有飛，Ｐ更成大熱門，奇怪﹗﹖「永勝寶貝」上場斜跑也追得唔錯，縮程未必應付不來。「安競」漸漸適應，應很快脫離三零部隊身分。

第3場  第五班（40-10分）1200米

　　機緣滙聚之前贏同程一役，沿路冇話賺過腳程，漫不經心地尾隨，待至直路悠悠閒拉出外檔上，衝到拉士二百米已奠勝，姿態好似大人同細路仔跑咁款，所以唔擔心133磅讓唔起﹔轉馬房後做得夠始動身，用到柏寶，擺出即搏格局。

    　「秒秒領先」劣檔能贏「分享」，水準值得尊重。「穩操勝算」都係寧短莫長，但實力真係有限。「好利高」縮程加罩，希望有變數，但老退得快係事實。「華劍寶」及「大隊長」此程唔係唔得，卻只係博博吓。「算得妙」如非操得太少或有機會，只因本身速度夠，若早段搶到欄，或可帶到。

第4場  第四班（60-40分）1650米

　　福到多多上場田草可能真係唔到，以致一步都冇，總之輸完大閘冇問題，又即刻縮回此程，用埋阿寶，一切安排都係向好。「十足十」在此班也要睇形勢，10檔也是博博吓。

    　「標青」上場跑到離晒譜，輸成點唔使理，肯轉場及加配件，再畀機會。「旭之光」上場那個第三的水準真係幾懷疑，尚幸今場２檔啱放。「萬人迷」唔叻，勝在檔好而已。

第6場  第三班（80-60分）1200米

　　威海歡騰夠快加1檔，仲喺Ｃ＋３欄，表面條件唔錯，如非亂放，有形勢之下不難上名。「超群財星」10檔難啃，削弱了競爭力。

    　「軍士」縮程得唔得，其實冇把握可言﹗﹖「包裝猛將」未完全成熟已有Ｐ，加程點都幫到手，係睇吓11檔影響有幾大。「馬之王」唔係特別超級，12檔隨時拖垮，有Ｐ已叻。「連利福星」及「兄弟齊心」檔位形勢唔係曳，唔排除會有點威脅。

第7場  第三班（80-60分）1200米

　　團隊精神1檔夾晒，冇錯，目前重磅及評分高，但既然之前一有形勢便起到作用，今場應該有威力。「駿蹄飛」上場衝落比預期失色，希望係初跑關係吧。有過一次谷中經驗，今趟可寄望跑得好。

    　「開心好多」及「超勝」剛仗在處理上俱有挑剔地方，呢次換人及檔好，小心。「祥勝愛駒」前次想放而放唔出，結果追得好，上場一放最後連渣都冇，唔知今場會點演繹﹖但明顯已漸入局。

第8場  第三班（80-60分）1650米

　　追月2檔啱其守好位跑法，「馬風雲」唔叻，但１檔會幫好多，一對分數掹掹緊嘅馬，或可因應形勢而做番齣好戲。

    　「旺家多寶」上場入Ｑ難度唔細，雖檔差也不敢睇小。「超勁精神」成日追得勁，但11檔兼蔡仔，發揮難料。「寶成智星」冇明顯放頭馬在陣，可能繼續賺。「紅日」和「超新星」路程能力有晒證明，只係穩定性冇乜，有賠率則可考慮。