賠率有路捉：勝利金剛有聰明錢

魑魅魍魉

　    第二場「勝利金剛」喺香港三戰都冇飛，最熱一次係上仗54倍，而且隻馬三仗都輸，上仗仲要輸一條街，超過37個馬位，雖則今晚抽一檔起步，但試問邊有馬迷會買得落手，但出奇地噚日早飛居然係87蚊熱門之一，位置更加係13蚊大熱，可以好肯定唔係公眾飛。

    　睇番近期谷戰隔晚有古惑嘅「駟馬難追」、「七星仔」等統統冇W有Q，呢隻「勝利金剛」真係唔好睇小，且看呢舊聰明錢係咪又得手喇。

飛躍星河擺明有計

    　另外，頭場五班2200米，雌馬「康樂名駒」上鋪1800米隔夜WP大熱，果然有料到，輕鬆贏馬開齋，今日原庄由卓利主轡，但噚日早飛明顯唔夠硬淨，反而佢蹄下敗將「飛躍星河」飛數就唔講得笑，呢隻馬喺谷中已經熱失幾次，照計都應該輸怕人，但噚日買到38蚊W，P更加係20蚊大熱，似乎有人唔怕「康樂名駒」之餘，仲有把握佢可以順利贏馬，睇番最近白德民搏馬得心應手，相信「飛躍星河」今鋪唔會令捧場客失望。

    　騎師王方面，韋達連做幾期騎師王，不過今期佢手馬好幾隻係老牌處女馬，例如「算得妙」、「萬人迷」同「兄弟班」，得十幾蚊唔值搏。反而柏寶嘅「機緣滙聚」、「福到多多」、「鉅業光輝」同「包裝猛將」質新有近績支持，有分頭點解唔買﹖

周仲