卡爾馬作客劏魚腩加費萊

猪拉多纳

今晚雖然只係得4場波，但阿King依然搵到筍嘢。瑞典超包尾大幡加費萊主場對卡爾馬，加費萊開季至今13場聯賽贏得1場，當中近8場輸晒喪失26球，就算換帥亦無力反彈；卡爾馬近2場聯賽作客先後擊敗佐加頓斯同科根堡，今場遇着「魚腩」贏波冇難度，阿King捧1.88倍客W。

（周二凌晨1時開賽、馬會網上文字直播）

加費萊自第2周作客2比1贏辛斯華爾後，其後11場聯賽只得1和10負，尤其4月尾起接連以1比6同2比6大敗畀赫根及哥登堡，近8仗輸晒仲失咗26球，平均每場失3球以上，咁嘅防線點畀到人信心。加費萊喺6月初辭退教練辛特貝治，改由助教湯馬士安達臣坐正，但佢上仗首次領軍，主場都以1比2不敵護級對手科根堡，證明呢隊波神仙難救。

卡爾馬現時位處聯賽中游不過不失，但勝在「應贏則贏」，最近2場作客對住下游球隊佐加頓斯同科根堡都擸晒3分，今仗只要發揮正常，贏波絕非難事。
佐加頓斯作客腳軟明益索特拿

另一場同時間上演嘅瑞典超索特拿主場對佐加頓斯。佐加頓斯剛將利比里亞射手森莊遜賣走，前線火力大減，加上連續5場作客都輸波，造訪索特拿仲要讓平半，寧捧下盤；最後推介巴甲明尼路主場對哥列迪巴，哥列迪巴近期防線演出亦見改善，可望喺傷兵滿營嘅明尼路身上搶到分，捧讓球客勝。

（周二早上7時開賽）