巴西女足搶韁強襲中國

猪拉多纳

奧運女足分組賽率先於香港時間周四凌晨揭幕，E組東道主巴西女足迎戰中國女足，巴西身為足球王國，但男足及女足都未贏過奧運金牌，成為國家一大遺憾，今屆有地利，梗然要把握機會打破宿命。巴西女足一向「搶韁」，近4屆奧運首場分組賽，獲得3勝1和，加上兩大射手瑪達及姬絲蒂安妮助陣，可輕取中國女足，捧巴西女足讓球主勝。

（myTV SUPER 801周四凌晨3時直播）
中國女足開操「有人冇波」

自從1996年奧運首次設立女足賽事以來，巴西女足喺5屆奧運有4屆最少躋身4強，其中兩屆打入決賽，實力毋庸置疑。「女森巴」往往可迅速入局，近4屆奧運首仗贏3仗，唯一和波係遇上勁旅德國。巴西女足最煞食地方必屬一對射手，「女球王」瑪達曾5度問鼎世界足球小姐，姬絲蒂安妮係奧運女足累積入球最多球員，兩人拍住上，無疑係所有後衞嘅噩夢。

至於中國女足闊別一屆後再次參戰，但佢哋實力同巴西有距離。兩隊近4次對壘，中國女足得1和3負，其中兩場大敗3球或以上。

日前佢哋進行首課操練時亦有阻滯，話說中國女足當地時間上午book咗法林明高嘅訓練場練波，點知組委會嘅先遣車行錯路，所有訓練器材同足球都「遲大到」，搞到中國女足成朝操練時「有人冇波」。去到下晝諗住操多課，負責嘅司機竟然唔識路，又比原定時間又遲1粒鐘先練習到，認真坎坷。以佢哋咁嘅備戰情況，遇上東道主恐怕難以全身而退，受讓都咪掂。