洪禮賢講馬：好兄弟P當W賭

魑魅魍魉

　　今個禮拜日唔係跑田草，10場賽事將在谷中上演，係咪在偏差最小的A欄已不重要，一來，去到季尾，谷草賽事唔理咩欄，往往都有一定程度的偏重，唔係檔位的話，就係跑法，所以就算在最闊的賽道，亦唔代表甚麼﹔其二，谷草日賽久不久會出現一些無厘頭的冷W，像季內11月的那期，全日10場固然冇大熱門可以贏到，兼且冷W都唔少，十倍八倍嘅，已有「幸運愉快」、「笑談中」，再冷嘅又有38倍「確奇妙」，同埋獨贏超過一千大元嘅「財駿福星」。當然，如果睇遠少少，上季差唔多同期嘅谷草日賽（19/4），該日又唔係點爆得出樣，冇一場頭馬嘅獨贏係10倍以上，但亦未至於由頭熱到尾噃，所以，總覺呢日唔會「平平無奇」，熱門客真係要睇路。

第一組方廐佔4駒

　　 跑親谷草的話，可以估到有咩馬房陣容最強，邊幾個較弱，譬如大摩馬房，上期沙田13駒出戰，但今期連埋後備都係得5隻咁大把﹗反而方仔就一如過往，成棚馬湧出嚟，唔計後備都有10件，單係第一組那11駒之中，佢已經佔了4駒，真係唔講得笑，可以諗到呢期又係佢大手交易之時，不過，嚴格來說，今次的方家軍有些未必靠得住，都係博啲有分頭較划算。

　　像「好兄弟」，今場才是季內第四回合，論體力點都秤先，始終同場唔少對手已跑殘跑攰了。此外，上賽休出在同程追得唔錯，沿途既殿後，又因阻礙曾經窒過，而臨尾就算湧入馬林一樣衝得似模似樣﹔重新開氣後，今次等番A欄同程，適應力仲正（5戰僅1場冇獎金），預期亦唔會好熱，雖則隻馬評分略高唔易贏，但P可當W賭。