馮諾嘉手記：信賴方嘉柏 十足十增程掂

魑魅魍魉

　　練馬師蔡約翰喺沙田賽事特別威水，但轉戰谷草表現就判若兩人，同樣谷中亦有谷草王，方嘉柏已經多季於谷草稱霸，今季亦一樣，暫時谷草成績最好，佢今季贏出四十三W當中，有成廿五場，亦即超過一半嘅頭馬係喺跑馬地獲得，所以嚟緊谷草日馬大家就要多多留意方嘉柏手馬喇。

　　周日賽事方嘉柏有十匹正選馬，當中最高班賽事一班1800米，佢就有成四匹參戰馬，分別有「喜聚寶」、「衝鋒槍」、「特寶樂」同「喜威寶」，好似志在必得咁，一班賽獎金較多，當然要落足全力，實行馬海戰術，而噚日提過嘅四班2200米長途賽，佢匹「十足十」亦屬機會馬，近三場谷草一哩都跑近，每仗所負都不足兩個馬位，突然增程就跳去跑2200米，雖然無根據難以做膽，但未開齋馬實好鬥心，練者咁嘅部署絕非無的放矢。

　　另外，三班1200米，方嘉柏亦有匹「開心動力」，呢匹馬演出準繩，對上五仗非冠即位，絕對可以做膽。牠前仗初上三班，一放到底，仲贏成個幾馬位。上場「輕輕鬆鬆」沿途快放，形勢造就隻「大旋風」後上掄元，而「開心動力」走勢唔多穩定下，亦只係輸條頸，今場再戰對手同樣有「大旋風」，「開心動力」上場大熱倒灶，今場定力求反勝。

　　四班1650米，方嘉柏「智友」亦有餐士，前兩仗贏馬後，上場轉戰谷草亦跑近。不過，呢場賽事對手都唔少，其中「包裝好友」更加係新勝猶勇，今場如果抽得好檔有力連捷，匹馬近幾仗都非冠即位，連續幾場於沙田入位後，上場一心轉場謀突破，係韋達胯下被捧成兩倍大熱門，二檔起步貼欄守好位，結果不負眾望輕勝成個半馬位順利開齋，開竅後仍有上升空間，只要今場抽得好檔就更有信心可作膽。