馮諾嘉手記：特寶樂同韋達合拍

魑魅魍魉

　　第六場三班1650米，小妹用咗「海力童」做膽，呢匹馬季內只係贏過一仗，路程正係谷草一哩，證明路有專長。上場跑同程排三檔起步，入直路走外叠衝刺，返嚟只係以短頭輸畀再出再贏嘅「精算攻略」，賽績夠晒硬淨，今次乘勇再戰有權補中。

　　對手之中，要先留意「驚喜」同「旅遊小子」，前駒跑過多場田草及泥地均大敗而回，上場初次轉跑谷草，卻後上殺入一席第三，僅以半個馬位不敵頭馬落敗，呢次隨即強配韋達，仲要抽得黃金一檔，必定要吼實。「旅遊小子」近仗演出相當準繩，近六場均跑入前四名，今次改配梁家偉減磅上陣要拖。

　　「哈哈大少」上場跑田草1400米後上獲季，末段造出全場最快嘅23.02秒，反映八歲老馬狀態回勇，今次轉戰谷草負輕磅，仲抽得有利二檔，不妨拖埋。四連環揀多一匹「大將風範」，雖然評分已經冇優勢，但呢場賽事預期放頭馬唔多，呢隻馬嘅前置型跑法或者可以佔到甜頭，可以加入考慮。

　　第七場一班1800米，方嘉柏有四匹馬參戰，小妹就最鍾意「特寶樂」，近四仗跑谷草全部不勝有位，而贏馬嗰場正正就係配韋達，今次人馬重逢預期可以交出最強威力，可以做膽。

　　配腳方面，先要吼實廐侶「衝鋒槍」，季內跑過谷草一次即勝，窄場威力有目共睹，今次用白德民操刀兼抽埋個黃金一檔，都有爭勝條件。「陽明好好」轉嚟谷草一試或者有突破。「喜聚寶」、「怡勝」兩匹馬都有卡士，就算負重磅上陣都有權接近。