借題發揮：博韋達唔手軟 6串1P搵餐晏仔

魑魅魍魉

　　柏寶停多兩期，便到韋達停4期，上次韋達連攞3W，依家追到66對69，睇佢今期嗰手馬，好有機會追到平頭，好運啲可能過埋頭。如果畀你係韋達，由最遠果時差16W，到目前尚欠3場，咦！冠軍之路突然重燃希望，冇理由唔搏晒命打番上嚟，尤其這陣子有番個勢噃。再講，佢之後4期冇得跑，阿寶可能會嘭嘭聲係咁數胡，到時唔知咩世界，或者阿寶又會拉番開差距，所以呢一兩期，韋達點會手軟，唔搵佢做扶手棍，即係同局勢對着幹，未必有so ！

　　睇埋隔夜騎師王賠率，即刻嘩然！佢1個人熱晒，參考賠率得13個半，零零丁丁得佢咁熱，之後再數落去，賠率最近嘅已經係9 倍、10 倍嘅阿昌和潘頓，睇格局又係似韋達贏三兩場當閒事！

　　係咁意單起隻眼掃吓佢手馬，「進勝福星」、「包裝好友」、「創新高」、「美猴王」等等，隻隻都好似O喎！其實仲未數到「特寶樂」和「沙貝利」之流，所以難怪呢期騎師王佢會熱到辣手！

　　3匹新勝馬冇挑剔咁，「進勝福星」、「包裝好友」同「美猴王」贏開嘅，公認佢哋手上仍有一定虛分，無謂雞蛋裏挑骨頭。至於「創新高」，上場好明顯係跑法上有誤，先至會名次大落後，話晒之前仲贏緊「蓋世子牙」，肯再換人一試，又有得分，點解唔博。另外，「特寶樂」和「沙貝利」，感覺上唔似有冠軍相，但又唔敢咬定冇「披」，始終近績幾準。數吓數吓，其實韋達今日出足十場，隨時六七件可以入到三甲噃！笨笨哋，唔貪心，整條6 串1P，或者搵到餐晏。　

亨利