洪禮賢講馬：旅遊小子着數

魑魅魍魉

　　嘩，韋達今期出現solo的成數都好高，騎足十場唔係稀奇，只係佢手馬可以話段段有，好似講波嘅口吻，前中後（場次）都咁強，又又又係贏少隻都要打pat-pat的局面，且看會否再中三元，還是四喜臨門吧﹗

重心場次

第10場  第二班（95-75分）1650米

　　好兄弟Ａ欄啱追，從往績已顯示到，而預計今場多馬走，形勢更佳。講到實力，前仗在唔多合適的1800米，沿途攞位蝕章，拉士幾乎有Ｐ，看來在此班唔係完全冇能力。既然上場跑得唔係太好，一樣衝得似樣，呢次唞夠而換人，不難令成績有進步。

　    「一團威」之前輸過畀「勇敢小子」、「安御」等惡馬，點計喺度都有分量。「加州滿意」轉到中程方是該走的路，既然剛仗初上泥地一哩即入圍，轉來谷草應該更惡。「愛跑得」均速性能來到谷草，或會由缺點變優點。

　    「沙貝利」真係好銳，但３Ｗ皆在田草，回到細場，加上搏咗幾場，體力會否「入不敷出」，唔係冇可能﹖﹗「悅璐孖寶」試大閘走勢唔錯，唔排除會有Ｐ。「天祿」上場演出好差，加上配搭唔多對路，落班才吼未遲。

第1場  第五班（40-10分）1000米

　　大情大勝11檔難應付，好在係1000米而唔係1200米，本身夠速度，或可救到，加上近績算準，膽材。「友情友義」檔好、降班和前速ok，其實在此已算條件唔錯。

　    「莎朗之寶」落班效應或令賠率較熱，但計數之前還在四班直路賽輸近，級數在此吃得開。「特別靚」從冇穩定性可言，上季跑完包尾，翌仗可入Ｑ，所以唔使介意近績，信韋達眼光及降班的優勢，可能有驚喜。再揀可能係「誠信心」，跑短未必唔得，而之前亦曾顯示能力，大冷博佢。

第2場  第四班（60-40分）1200米

　　皆大歡喜上場輸在前中段畀頭馬拖慢嚟放，結果差一步追唔切，但一再入Ｑ已顯示出四班夠贏的本事，希望今場步速正常，佢可以贏番場。「進勝福星」正處虛分期，只係擔心細場未必發揮到最強威力。

　    「卡加精神」加脷帶如改善到陣上側頭及操控唔好的毛病，應會續有進步。「健威王」落班有利，但總覺未完全入局。餘駒冇咩好講了，充其量可選擇係「齊勝」或「辣得喜」。

第3場  第四班（65-40分）1650米

　　包裝好友上場贏到甩晒，展示出轉場後的威力，只係多負3磅，就算對手強咗，亦唔覺有阻力。「智友」人人等方仔幫隻馬加眼罩，事關贏今季第一Ｗ之前的大閘，已經係有罩而追得好，既然剛仗一輸即在配件上動腦筋，有心再搏。

　    「生生不息」跑低半班加上小將的１０磅優惠，形勢由弱轉強，只要小梁處理上冇大錯，擺在前走，對手唔易追。「靚到爆」長期可於末段湧得吓，呢場如有利追，佢就有行。「歡騰」落班即回到首本路程，就算外檔也不怕。

第4場  第四班（60-40分）1650米

　　天寶之威一再指出此際當弗，若不，練者斷唔會係咁畀佢喺唔多有根據的路程出擊。今場谷中一哩性能冇問題，如加配備可以冇咁被動，殺傷力更大。「真奇寶」除咗佢，今場冇明顯放頭馬，或食正形勢。

　    「心頭好」來到季尾狀態又返嚟。「創新高」剛仗演繹唔妥當，敗績當睇唔到，總之能贏「蓋世子牙」，四班幾惡吓。「駿冠」神經刀，隻馬有心情肯跑，隨時掃晒。「奄尖大少」隔夜熱得緊要，初跑谷草一哩居然惹到咁多飛，奇怪﹖

第5場  第四班（60-40分）2200米

　　勁好友上賽直路唔係阻窒過，贏埋唔奇，終於明白點解隻馬要不斷加程，原來試到大長途啱。好開又試好晒，唞番夠再揀此程，一定搏到贏為止。「好歡騰」剛仗已經揀過，直路初以為會墮退，點知拉士又湧番上嚟，演出略有驚喜，拖多次。

　    「火耀雷霆」如果卓利處理上比德叔為佳，今次能力會三級跳。「經典能量」由4檔變大外檔，冇理由又有夢幻形勢啩﹖﹗「十足十」加程得唔得難料，但死步頭馬加程會易啲應付。

第6場  第三班（80-60分）1650米

　　旅遊小子準字行頭，條件已比好多對手優勝，加上能與「精算攻略」互有勝負，孭住122磅，真係幾着數，又係嗰句，如小梁發揮到，唔係冇得贏。

　    「海力童」及「驚喜」上場同程跑二三名，輸畀強手冇得好講，但如果跑得番應有水準，唔難再入圍。

　    「威力高」現階段1800米可能好過一哩。「得寶飛駒」追得一次，唔爭在畀多次機會佢，總覺佢上次臨場行圈時，神態係返緊嚟，隨時到位。「大將風範」有能力卻傷完腳。

第7場  第一班（115-90分）1800米

　　怡勝級數在此場數一數二，好歹兩仗前才輸少少畀一對「好」，本身又擅跑此程，假如地慢仲正。「衝鋒槍」及「特寶樂」一對方廐馬，冇咩唔好，賽績準又襟弗，正路配腳。

　    「千杯不醉」終於換人，等咗好耐﹗上場之敗係咎由自取，不必上心，只負111磅，又唔覺佢分數盡晒，唔係冇得博懵。「花好月圓」級數高，只係隔咗一大輪冇跑，唔知交得出幾多成水準。

第8場  第三班（80-60分）1200米

　　開心動力12檔，個心真係冷一截，好在今場冇乜快馬，要在早段搶埋欄唔係好難，救得到的話，計馬應有三甲。「大旋風」上賽前已講過未必唔夠班，贏開而加磅有限，再跟。

　    「紅褲子」剛仗遇意外仍輸近（馬鞍滑移），或是回甦兆頭。「化工之昇」近仗在田草也跑得好，回到此程應更叻。「永利多」縱有輕磅及檔利，最多都係Ｐ居多。「十則圍之」和「勝利旋峰」邊線馬。

第9場  第二班（100-80分）1200米

　　美猴王此程4戰未輸過，今次條件唔係特別惡劣，不難保持長勝紀錄。「明燈」準繩程度從近仗已感受到，第二勢力。

　    「鼓浪天風」長期都揀佢，尤其係跑此程之時，實在對上幾次同程亦跑得唔錯。「高點」大閘走來對辦，轉配件或起到刺激作用。「星運伯爵」休出向來唔怕，希望啱追便有機會。「步步快」唔係大外檔或會諗諗。