比錫達斯頂得住拿玻里

猪拉多纳

歐聯B組今晚有望誕生首支出線球隊，如果拿玻里主場擊敗比錫達斯，而同組基輔戴拿模主場同賓菲加打和，拿玻里就可以破紀錄，成為歐聯史上首支提早3輪分組賽出線嘅球隊。不過，呢支意甲勁旅近期表現走樣，兼有射手米利克養傷，要創造歷史並唔易，今仗讓一球球半太過火，寧捧比錫達斯下盤。

（有線63台周四凌晨2時45分直播）

B組形勢比較奇特，拿玻里兩戰兩勝，亦係唯一贏波球隊，如果今場贏埋，而基輔戴拿模同賓菲加打和，就會出現拿玻里獨取9分，其他3隊各只有2分嘅情況，屆時就算拿玻里最後3場輸晒，由於另外3隊需互相廝殺，冇可能有兩隊同時得分多過拿玻里。即使最極端情況，拿玻里同另外兩隊同為9分，拿玻里都可以憑較多對賽得分，穩佔16強席位。
主隊缺米利克火力減

不過，亦因為拿玻里出線形勢大好，爭勝戰意未必高，而且佢哋表現走下坡，已連續兩場聯賽輸波，加上射手米利克受傷長抖，呢位波蘭國腳今屆歐聯已射入3球及1次助攻，係球隊兩戰全勝嘅大功臣，佢缺陣肯定削弱拿玻里攻力。

至於土耳其球隊比錫達斯非常硬淨，歐聯兩場皆和，聯賽7戰亦取得5勝2和，絕非泛泛之輩。加上佢哋只有2分在手，搶分迫切性遠比拿玻里大。更何況比錫達斯受讓一球球半，即使淨輸1粒，下盤都有錢贏，夠晒抵玩。