馮諾嘉手記： 此時此刻令人難忘

魑魅魍魉

　　早前講過方嘉柏同葉楚航谷草成績犀利，結果剛戰前者起孖，後者更中三元，當中「卡加精神」、「智友」、「勝任有餘」同「衝鋒槍」都係小妹嘅心水，總算有啲斬獲。

　　另外，韋達當日包辦三寶，頭馬數字終於追到同柏寶平頭，由於亞軍次數較多，更響騎師榜超越柏寶排榜首。不過，奉勸韋達都唔可以開心得咁早，皆因跑完女皇盃賽日後，輪到佢要停賽四日，到時可能又到柏寶發威。而可以肯定嘅係，韋達一定會趁住柏寶仲未復出，今戰盡量贏多啲馬，務求拋離對手。

　　講番心水，第三場五班1800米，小妹揀咗「馬霸龍」做膽，上場跑同程表現的確唔曳，早段因慢閘而留到包尾，但入直路就衝刺凌厲，響蘇狄雄胯下殺入一席第三，今次再跑同程排內檔起步，係時候補中。配腳拖番抽到黃金一檔嘅「活力威」；「煇煌駒」、「神箭金剛」近期狀態都唔錯，可一併兼顧。「好機緣」上仗贏馬後加分唔多，可繼續反彈。

　　第七場三班1000米，小妹鍾意「此時此刻」，前仗初出響同程排九檔起步，出閘後搶放卻被「同心威駿」頂住埋唔到欄，結果返嚟只係輸半個馬位跑第三，演出令人難忘；自購馬上場第二次出賽，表現走樣並唔出奇，今次抽到五檔起步好跑得多，隨時可以變身。對手方面，「勝在分秒」近四仗獲三冠一亞，忠心馬一定要拖。「勁勇士」上場贏得好輕鬆，上班一定夠爭。「欖球樂園」有實力，排外檔都唔可以睇小，四連環拖埋前仗後上跑近嘅「軍刀」。