朝早有動靜：此時此刻沈廐搏殺

魑魅魍魉

　　今晚谷中八場草地賽事，各路人馬備積極，昨朝所見苗禮德、姚本輝、沈集成及吳定強均甚為緊張，整朝跟出跟入睇實旗下戰馬出操，似乎有出擊意圖，實宜多加留意。

　　其中苗禮德便對列陣第四場四班1200米的「精英財星」最為緊張，眾多戰馬之中獨睇此駒，昨朝馬兒由副練踱步後，即見苗禮德亦步亦趨跟實返沙圈，人馬會合之後，更見練者非常仔細打量，並向鞍上人問長問短，動態極有瞄頭。上仗「精英財星」轉苗廐初出，在田草1400米不敵「幸運相架」得第二，雖然未能一擊即中，但已反映幕後急欲交代，今番轉戰谷草1200米，必須重視。

　　至於沈廐方面，今晚只派「此時此刻」一駒參戰，昨朝此駒出操前，即見練者由烽火台返馬房打點，吩咐助手策騎馬匹先前往機坪熱身，然後再往內圈出踱練氣，期間更見沈集成全程吼實，動態相當肉緊，今次此駒再度出征谷草1000米，一定搏命。

　　另外，吳定強季內有十一場頭馬在手，只差兩場便可上岸，為免夜長夢多，必然力爭成績盡早達標。昨朝一早見到練者在沙圈睇實「魅力漢子」、「領航動力」行踱，舉動不尋常，有盯緊必要。

　　出爭第五場三班1200米列陣之「魅力漢子」，已屆十歲之齡已冇保留價值，今次回爭谷中強項途程一定搏老命。這匹老馬近期在晨課依然活力充沛，若臨場有任何風吹草動，不妨跟進。

韋柏