|
|
呢次騎師王隔夜賠率，終於唔係韋達得十幾蚊嘅形勢，事實上，佢手馬好多隔夜熱唔透，有啲危危哋，睇嚟唔係冇得博，像潘頓及阿滇，分別係7倍和10倍，有唔錯分頭，諗得過。
重心場次
第5場 第三班（80-60分）1200米
魅力漢子近績麻麻哋，但冇辦法噃，鬼叫跑親嘅路程都唔係佢杯茶，谷草1000米或田泥喎，成績點會好﹗終於肯返到首本（3場三班此程冇Ｗ有Ｑ），而賽前工夫唔係放軟晒，應該係落點吧。
「滙名燈」冇咩唔好，路程性能一流，又係新勝馬，只係擔心呢對騎練今季合作紀錄而已（2P44負）。「御將軍」經過前仗適應後，剛仗又係守好位跑法，而拉士有番應有的貫注力，證明三班未失勢。
「嘉飛」近仗波動性好大，早前才好哋哋跑獲三三四四，之後突然包尾，尚幸上場輸近番，希望係回起先兆。「金紫荊」上次可能係田草及外叠關係才大敗，回到短途及谷草或唔同晒，加上冇馬走，剩係得佢，有埋2檔，或放到入一席。「多多昇」大外檔唔易克服，同埋，覺得佢分數略高了。「氣定神閒」上場那殿軍輸得幾遠，不過，一再識追吓馬，顯然係轉好中。
第1場 第四班（60-40分）1000米
領航人現階段唔只有速度，拉士仲識追吓馬，確認有點進步，處身一場形同條件賽的場合，頓覺優勢。「永勝寶貝」上賽前已講過唔介意縮程，能夠入Ｑ已交足貨，希望因應對手唔強，有機會爭出頭。
「可圈可点」始終係謝謝哋，目前在此班的優勢唔係咁明顯。「祥禎」剛仗跑得幾差，換小將仲排外檔，唔易蟲變龍。「領航動力」唔怕7檔，只因速度夠，如非沿途太蝕，或可憑主動跑法入圍。「威威財星」排大外檔，爭位居多。「龍得風雲」地莊見晒，爭Ｐ之流。
第2場 第四班（60-40分）1650米
連利威勁由從自己一隻馬在後列都會跑錯晒，到近仗跟得鬥得吓，進度幾明顯。按陣上走勢而言，轉谷草短直路可能仲好。「歐洲駿馬」落班用韋達，又肯繼續跑輸近路程，係時候再露一手。
「威威福星」四班就算外檔也蝕得起，喼到上賽水準已夠入圍。「大東海」上場入Ｐ仍覺直路幾論盡吓，此類馬陣上際遇一唔好，隨時連渣都冇。「香檳王」係咪前次贏馬用力多，令上場跟好位返嚟冇，真係幾難知道，希望回一回對體能有幫助。「駕馭」上場錯失機會，呢次仲要排外檔，難言信心。「卡加小子」偶爾休出好，雖則初出跑一哩好難，惟神怪馬落班倒有so。
第3場 第五班（40-0分）1800米
神箭金剛上場跑到被小組話（指騎者欠決斷力），但今場落班及轉程，有晒下台楷﹔季初可在五班此程力退贏到上四班的「呼風喚雨」，卡士高晒，除非今場冇得追，若不，邊有對手直路頂得住﹗
「駕世鞍」上場成條直路塞死咗，包尾唔關實力問題，既然上賽前試閘見好，畀多次機會。「煇煌駒」及「馬霸龍」，一對上賽同程跑二三之馬，條件冇大變動，仍有機會。「活力威」和「大將風騷」，跑法一樣，計埋檔位，前駒着數多少。
第4場 第四班（60-40分）1200米
高升睇番上場沿途外叠蝕，仲係首次跑谷草，返到直路騎者唔係畀咗好大壓力，隻馬自己一樣肯湧，賽績出色﹔落班、換回主帥及檔好，三項轉變的條件足以大幅提升名次。
「龍船旺」和「精英財星」各有缺點，配腳才考慮。「好玩」、「成功網絡」、「再來風」和「勁辣椒」唔放唔得，或出現互燒局面。「得令先鋒」守好位跑法或因前幾駒關係而受惠。
第6場 第三班（85-60分）2200米
紅跑車正處於踩行油階段，未贏之前唔會手軟，按去季同程攞位賣大包都輸近，大長途不會有太大問題，膽材。「浦紅之友」路程專家，一向夠準，換潘頓如因而好分咗，更加值博。
「危險英駿」及「頭盤」根據有限，卻唔係完全冇得爭。「錢程萬里」此程紀錄保持者，計死數仍有機。「正歡騰」上場在「夢似的賽事」大敗不代表什麼，隨時返嚟。「好知己」邊線機會而已。
第7場 第三班（80-60分）1000米
此時此刻一場好一場曳，要賴只可賴際遇，但計番前仗入Ｐ的過程好有難度，今場檔位內移，點都好啲。「欖球樂園」不論上賽係托大或是真係鬥輸，132磅幾乎贏到，反映加分後仍冇阻力，後生仔上班忽然少負18磅，可能仲勁。
「勝在分秒」路程專家中的專家，冇理由唔拖。「勁勇士」剛仗12檔可以贏得咁輕鬆，升班唔覺有好大影響。「星光活力」除非又離奇利於二叠前置，若不，難再突破。「尚駿心」確認係碎料，要好有形勢才有資格上名。
第8場 第三班（80-60分）1650米
善戰有晒一哩經驗，轉到此程仲啱，檔好亦易於早段泊位，博得過。「帝豪龍駒」流完鼻血復出尚有兩腳，喼得住出賽頻率，應比上賽鋒利。
「寶成智星」唔係10檔必揀。「重量級」上場唔要命咁放，敗績可當「視而不見」，呢次3檔如處理得好，隨時可平反。「奔騰飛駒」分數減到過晒籠，早前大閘試得唔錯，半冷門。「寶利多」一哩唔係完全唔得，前中段如扯得快，或有機可乘。 |
|
金睛卡
发表于 2010-4-21 17:27
变色卡
显身卡