馮諾嘉手記：盈彩繽紛五捷在望

魑魅魍魉

　　聽日沙田十場賽事，重頭戲當然係冠軍一哩賽同女皇盃。睇番以往多屆成績，冠軍一哩賽以港隊馬成績較好，自05年開始有海外馬參戰，至今五屆全部由主隊馬勝出，而上屆更由「勝眼光」同「再領風騷」串Q，季軍則係曾在港服役嘅「大腦」，今屆三駒再次碰頭，唔知會否出現翻版賽果呢？

　　至於路程為2000米嘅女皇盃，就以外隊成績較突出，當中有七屆係由外隊馬勝出，上屆就由「百威勝」奪盃，而港隊嘅「爆冷」同「自由好」則跑入二、三名，成績都算唔錯。今屆「百威勝」亦有來港力圖衛冕，港隊代表則有「閒話一句」及「爆冷」等實力馬應戰，相信到時競爭必定激烈，各位不妨入場為港隊馬打氣。

　　第五場二班1200米，小妺揀「盈彩繽紛」做膽，至今四出四捷，實力如何唔使多講，五連捷在望。配腳先揀近三仗非冠即亞嘅「富高勝」，回師贏馬途程1200米應該更啱跑。「牛精巨星」上場在港初出即上名，熱身後表現隨時更佳。「虎虎生輝」上場初跑谷草落敗唔能夠作準，返到沙田作賽咪睇小，四連環拖多匹上場跑近嘅「正本仁心」。

　　第十場一班1400米，「雅雪」近四場獲三冠一季，狀態正值大勇，只要發揮正常，穩食尾胡。配腳方面，「正黃旗」、「聖法理」上場與「雅雪」同場都有唔錯走勢，值得一併兼顧。「金獅威將」上場追得唔曳，重戴眼罩要拖一票。「披星戴月」唞足三個月先上陣，未可忽視。