洪禮賢講馬：天下寶降班翻生

魑魅魍魉

　　沒有韋達的日子，柏寶騎足８場，好難唔會畀人過分睇重，當然佢好些坐騎Ｏ喎，但又唔係件件都擺得落個口﹗此外，阿滇和馬偉昌，各有三兩匹坐騎具冠軍相，騎師王有得諗。

重心場次

第6場  第四班（60-40分）1650米

　　天下寶上三班跑了10場冇場有三甲，如果計佢季初贏此程的水準，咩眼鏡都跌爛晒（為季內接近40場四班同程最快）﹗箇中原因唔明，但呢次匆出跑番四班，可能會翻生，加上用到柏寶（騎練今季12次合作8駒入前四名），配搭似樣，膽材。

　    「永得勝」欠缺放頭馬的場合，佢嘅主動跑法吃得開。「勝任有餘」上場略跟前即贏到，加分後負磅唔算重，仍然有得揮。「蓋世子牙」回一回返谷草及換人，再畀機會，始終之前一再上名的難度好高。

    　「越戰越勇」進步幅度唔係冇但慢，上場已見閘前反應順晒，追勢則ok，寄望跑完再進步多少，或可入圍。「霹靂子彈」剛仗衝落勢頭唔係幾強。「中華寶寶」跑姿尚有點論盡，大外檔驚難克服。

第1場  第四班（60-40分）1650米

　　勝利雄威上場跑短途唔啱，賽績不用計，因立心落班，再之前的成績也不宜睇得太重﹔總之三仗前可在三班與「金碧亮馬」埋Ｑ，點會冇番咁上下斤兩。「共同努力」已講過一哩應該最啱，3檔起步亦可配合到守好位跑法。

    　「皇帝旨令」落班第三回才加程，部署穩陣，所以，唔使太介意之前兩場短途無甚威脅。「贏啲啲」殺番上四班，未必啃唔落，但11檔難攪。「順利多」上場衝落唔係多﹗「快馬當先」落班好快現形。「燈胆寶」從來冇打叠上名，所以喼唔到唔奇，隔一隔或嚟番。

第2場  第五班（40-10分）1650米

　　精靈拍檔轉馬房初出跑1000米，打句問句都唔信﹗結果沿途殿後劣勢下，拉士湧得吓﹔開氣後即回到一哩，有埋好位輔助，有權變身。「華劍寶」及「我跑得」勝在演出準繩，隨時跑到入二二三三。

　    「龍子」上賽際遇和發揮錯晒，先至輸得遠，唔排除突然近番。「超理想」上次跑到拉停咁滯，但呢次隔夜好多飛（其實頭三場潘頓嘅馬熱晒）。「彩旗飄飄」與「火鳳凰」，多馬走的場合唔啱。

第3場  第三班（80-60分）1200米

　　包裝猛將兩大不利因素纏身，重磅及劣檔，但上賽贏得太過清脆，未必克服唔到。「紅褲子」一連兩場俱有藉口原諒，總覺佢時候差唔多，畀埋呢次機會才分手。

　    「六六精英」實力係得咁多，減幾磅則令能力稍作提升。「多多昇」終於排到好位，如加鼻箍幫到早段唔慢，或有勝機。「好新聞」剛仗表面上係沿路守好位都唔得，實際在直路彎曾勒避，唔係冇影響，惜呢次8檔則有點尷尬，限於邊線。「功力勁」唞夠會好，但轉倉初出則要估﹗﹖

第4場  第四班（60-40分）1200米

　　成功年代計往績嚇親，因為贏同程一役，二三名之後共獲5Ｗ4Ｐ，佢在此班點會冇優勢﹔三場中程撞板後，唞番一輪儲夠才返到此程，檔好又有柏寶，應有決心。

　    「厲行星」上賽早段有點阻礙，最後仍可沿欄撲到入Ｐ，其實幾犀利。「神力金剛」兩場俱輸拉士被窒，如果今場唔係11檔，本有贏面。「喜在心頭」係睇吓信唔信有打叠而已，計分數未完全摸頂。「亞洲橙王」和「奪寶群英」如果利追，或有價講。「太陽昇」前仗慢放偷雞，上仗立即打回原形。

第5場  第四班（65-40分）1200米

　　卡加精神加綁脷帶的確令陣上操控好咗，少了頭側側及「片」，呢次對手只微微升級，仍有機會冧莊。「大進」縮回此程贏級數，Ｃ欄2檔未跑先賺﹗

　    「靚得開心」回到谷草更具議價能力，始終係衝力短之馬。「太極至尊」偶一失準勿太介意。

    　「化工之昇」剛賽拉士爆唔起係幾失望。「海王子」有級數但路程性能輸蝕。「成功網絡」和「祥勝愛駒」早段或爭持不下。

第7場  第三班（80-60分）1800米

　　多贏勁駒上場用柏寶卻令成績掉頭回落，末段唔知係隻馬「片」、曾受緊迫，還是騎者feel到坐騎唔多力，總之騎姿怪怪﹔輸完整番個大閘，加埋眼罩試，拉士仲識得追趕，整體已收貨，十幾廿倍博得過。

    　「龍的傳說」和「智友」，一隻係班內長途前列常客，另一隻係贏開當打嘅馬，正路配腳。「威力高」大致已失晒信心。「本地實力」進入穩定期，再有表現唔奇。「星際雄師」和「引伸波幅」隔夜好分得滯﹖﹗

第8場  第三班（80-60分）1650米

　　福到多多正常發揮之下，差唔多未試過在同程跑得唔好，重上軌道回到三班，其實唔使擔心。「發達心聲」長期在前幾名過終點，太準了，點都要預佢一注。

    　「馬風雲」與「超新星」計番今場整體形勢，後駒應可反先。「追月」換人，威力可能大幅升級。「旺家多寶」冇檔又會再打回原形。「大將風範」贏完一滴飛都冇﹗「靚到爆」恃輕磅可能爭到三三四四。