馬主論戰

魑魅魍魉

霹靂槍四班惡

　　勞愛德剛戰憑「太陽昇」同「靚到爆」起孖，搏殺手風大順，今日我哋隻「霹靂槍」（圖）正係交畀佢操刀，希望可以贏番一仗。雖然呢隻馬來港後仲未贏過，但話晒季內曾經響田草1200米同「明燈」串Q，今次落到四班跑同程，點計都有啲着數，如果贏埋就最理想。

　　另一匹勞愛德坐騎要吼「好友福」，四歲馬今季愈跑愈進步，近四仗贏咗三場，雖然今次要面對「鳥語花香」、「同一世界」等強敵，但計落未必唔夠爭，不妨玩番多少。

梁廷鏘、寇鴻萍

吼實十則圍之

　　今日我哋隻「電訊巨星」有份上陣，希望可以有好表現喇﹗講番心水，鍾意第九場「十則圍之」，轉去蔡廐後兩仗都跑第五，已經試準晒走勢，今次搵嚟白德民操刀，唔會係陪跑咁簡單，有望取得轉倉後首場頭馬。

　　冷馬鍾意第四場吳廐「天鷹」，上場跑谷草2200米，末段失驚無神衝上嚟跑第五，證明評分已經減到有利水平，如果今場跑谷草一哩或者1800 米，一定好多有人吼實，反而跑田草1600米就唔會有人問津，想食大茶飯一於博佢。

張敬山

醉味實力雄厚

　　大摩近期手風順到不得了，今日馬房亦有多匹惡馬上陣，點都要繼續吼實。尾場摩廐派出兩駒上陣，個人較鍾意「醉味」，今季四戰獲一冠三亞，演出夠晒準，上次跑精英碟只係輸條頸比「好先生」，已經證明實力雄厚，今次跑番一班賽穩食尾胡。

　　另外鍾意第四場「神州八號」，前仗以風捲殘雲後勁打開勝門，一早顯示出質素甚高，上場增程跑1400米輸咗，可能係由於變化地唔多啱發揮，今次增程跑1600米，臨場冇雨嘅話隨時變身。

任達華