洪禮賢講馬：歡樂繽紛冇挑剔

魑魅魍魉

　　歡樂繽紛冇挑剔韋達仍然停緊賽，焦點不免落晒柏寶身上，之但係，今期形勢可能會唔同，事關潘頓亦係受惠者之一，像一對韋達贏開嘅蔡廐馬都過咗戶畀佢，同時，手上仲有幾件硬嘢，唔係冇得同阿寶鍊過噃﹗


重心場次

　　第7場  第四班（60-40分） 1400米
　　
　　進勝福星14檔無疑係一大負面因素，此外，呢對騎練合作季幾未Ｗ過，但隻馬的確進步，前仗贏來有heart之外，明顯唔見初出嫩水的走規。至於上賽之敗，細場唔多啱會係主因，另外，早段隻馬落腳係慢咗，令尾段貫注也不足﹔終肯增程一試，應該有好冇壞，威力或大幅增強。
　　
　　「芙蓉威龍」前仗已有揀，唔係拉士受阻可能已經贏咗，而上場「無端端」用咗放頭跑法，敗績算吧啦﹗輸完其實曾放緩準備，呢排明顯趕工，夠唔夠唔敢講，但如果賠率太熱，拖腳算吧。
　　
　　「雄獅寶貝」前仗幾乎贏埋，或是唔襟搏才冇打叠，如是賽利追，佢大有機會翻生。
　　
　　「雄心馬主」四班此程往績太強（在苗廐11場有3W5P），加上人馬兩次合作贏晒，數據好掂。「幸運來」末段仍然內閃嚴重，排內檔亦唔會幫到幾多。「魅力心」前仗鍾意過，隔完一場返此程本來啱數，但賽前曾經又傷又腫，有懷疑。「中環英雄」如果又似上賽12檔沿途外叠，唔會蝕得起。「勁快」解釋唔到點解上場輸幾條街，但如計近績，唔係冇影響力。

　　第1場  新馬 1200米
　　
　　軒轅勇將漸漸養成韌力，轉程也不怕，加上，缺少了強敵，有權坐正。「獵豹小子」落腳慢，加程應會好，除非連此程都嫌短，若不，唔難有三甲。
　
　　「讚惑」初出表現比預期失色，希望開氣後會唔同﹔反而「美妙時機」首戰有驚喜，可追。「幸運多多」上場放得過急，情緒唔穩引發，加配件幫唔幫到係靠估。

　　第2場  第五班（40-10分）2000米
　　
　　年年如意、「飛躍星河」及「百笑」上賽差唔多位置過終點，但三駒俱沒有穩定性可言，計績則以前駒略好。

　　「魅力影子」跑到嚟季尾漸漸有番狀態。「勁霸龍」轉馬房後兩出有唔錯走勢，惟此程可能嫌長少少，可視為冷腳。「金像太子」外檔或有影響。「足球大師」檔靚幫到好多，但季內反覆得好緊要。

　　第3場  第五班（40-10分）1600米
　　
　　智勇非凡冇馬放場合應受惠，講到能力，曾先後與季內攞兩Ｗ的「又靚又叻」、「開心財星」埋Ｑ，如交出應有水準，放返唔奇。
　　
　　「皇仁俊駒」同樣會因冇步速而賺形勢，加上好開，或可打叠上名。「利之寶」外檔驚人馬蝕唔起。「高歡」未降班前一再輸近，落到五班實有優勢，只擔心九百幾磅馬仔的負重能力而已。「開心財星」贏卡士，但重磅削弱了能力。「機緣滙聚」喼番出賽頻率，隨時變身。

　　第4場  第四班（60-40分）1600米
　　
　　靚好聲出閘反應一次好過一次，惟上賽拉士內閃情況幾嚴重，如加罩有助或可出頭。「旅遊大亨」冇步速隨時又係得個近字，如果秤賽績則比大部分對手叻。
　　
　　「神州八號」上場一出閘就搣飛，成隻跳起打亂晒發揮，敗績不用理，還是用回前仗輕勝的水準去計。「新意思」和「標青」有入Ｐ能力，卻沒有把握。「創出傳奇」短途閃閃身追得好，雖然加程未必即刻應付到，因賠率太冷，建議小注試試先。

　　第5場  第四班（60-40分）1200米
　　
　　漸信良駒初出表現唔算特別養眼，一來，閘前反應普通，同埋，末段內閃幾嚴重，但又唔係唔識追馬，看來手上有一定虛分﹔開氣後加程，應更合腳法。「龍得風雲」早已指出唔叻得去邊，只係近況ok，及１檔慳到腳程。
　　
　　「駟馬難追」唔係排大外檔，可能搵佢做膽。「電訊巨星」暫時集中火力跑1200米冇錯，轉到長直路亦會幫到。「三陽盛泰」兩場的演出有好大變化，今場還要檔好及磅輕，要拖。

　　第6場  第四班（65-40分）1200米
　　
　　　好利利贏得「蜚聲」，在四班A組就算重磅仍有壓倒性優勢。「風動寶」長跑長有，冇咩挑剔地方。

　　「飛闖」唔知有痰的後遺症影響多大，按初出水準的話，跑低半班唔難發圍。「確威星」縮回短途，應較轉向中程來得實際。「霹靂槍」面對多快馬的場合唔易搵食。「家橋」前仗頭馬水準唔係咁可靠。

　　第8場  本地二級賽 1200米
　　
　　鳥語花香級數贏晒，唔係主帥騎，都冇咩所謂﹗「同一世界」能力稍與前駒有出入，但已是穩坐第二把交椅。
　　
　　「好友福」當弗，實力則有一定距離。「綠色駿威」返唔到盛時水準，惟八、九成馬也足以入圍。「極奇妙」剛仗行圈時已見疲態。「開心歡笑」及「火箭動力」難贏，但久不久會入到嚟。

　　第9場  第三班（80-60分）1200米
　　
　　開心動力用十磅仔仲有埋1檔，的確幾着數，如堯仔處理恰當，唔難爭入前列。「開心自在」終於肯轉大場，料可充分發揮後勁。
　　
　　「特色咖啡」縮程效果難料，近績則予人信心。「旅英駿駒」新馬插班係蝕，惟一下子少負15磅，未必克服唔到。

　　第10場  第三班（80-60分）1400米
　　
　　奇葩前仗已看重，結果打叠攞兩Ｗ，贏出一股勢，留在原班唔應該有阻力。「幸運愛駒」上場唔係放得過快，或更有威脅性，總之準開嘅馬，正路腳。
　　
　　「曬冷王」上仗得殿軍好犀利，因出閘唔好，直路又要花時間左搵右搵跑線，按之後衝勁，如當時早點踩油，九成有Ｐ。寄望跑完有點進步，能力便會翻一番。「傾力之城」中線係呢啲路程嘅馬，不過未有經驗點都蝕啲。

　　
　　第11場  第一班（105-80分）1600米
　　
　　歡樂繽紛上陣６次非冠即亞，往績準成咁，基本上冇咩好挑剔。「醉味」陣上忠心程度一流，只忌今季此廐未有一駒初戴面箍嘅馬贏過。
　　
　　「卓爾非凡」一再與強手串Ｑ，自己都唔會曳得去邊。「沙貝利」終究也４Ｗ了，真係唔使回氣﹗﹖「貝利高」上場的第三名輸好遠，水準普通。「藍天」又係磅和檔有利，邊線馬。