高清睇跑馬：引伸波幅大超班

魑魅魍魉

　　今季總場次566谷草三班1800米，「引伸波幅」對上兩戰快放取得佳績，尤其總場次476場田草1800米，頭兩段步速比1400米更快，竟然一放絕塵，但這一役起步積極推騎反應平平，並且多駒搶前，「引伸波幅」未能用最佳領放跑法，仲要推騎反應欠奉，諗住凶多吉少，早段被迫留守第八、九位，跟住「智友」走二叠，去到八百米開始走出三叠，望空下立即奮力上前，不用推騎走勢亦強勁，走至四百米更過埋領放的「瀟洒叻龍」，雖然中段踩油用力不少，但入直路依然衝刺凌厲，更愈走愈勁順利贏馬。此駒今季五度贏馬，跑法彈性，反映大超班，周三原班再出轉戰泥地有力執多W。

　　另外，總場次496谷草五班一哩，「朝東之星」六檔起步，可惜出閘笨拙，之後更在雙雙斜跑的「華劍寶」與「野蠻」之間勒避，失了先機被迫留後，去到千三米處再度勒避，仲被迫走出三叠望空。八百米順勢加速，去到六百米更超越所有馬匹，不過未能彈甩對手，直路初被「火鳳凰」及「華忠寶」咬到實，慶幸衝刺不俗，最後力拼殿軍，僅負一又四分三身位，是至今表現最好一次。賽後被重手加了四分，深得評磅員重視，周三晚跑五班泥地一哩要盯實。

Sam