馮諾嘉手記：好利利演出夠準

魑魅魍魉

　　聽日沙田十一場賽事，參戰馬相當踴躍，反而騎師就人丁單薄，本來已經有幾位騎師停賽，依家再加埋普萊西、白德民及都爾請假遠征，搞到練馬師可用之人買少見少。

　　馬會今次都有遠見，一早搵左人黎幫手，剛戰來港客串一日澳門騎師杜西奧，雖然冇頭馬進帳，但都憑「電訊高星」跑入一席季軍，未至於空手而回。聽日就輪到鄧迪來港客串，總共騎九駒咁多，其中「雄心馬主」、「海王子」都係機會分子，即管睇下佢有冇頭馬進帳喇。

　　講番心水，第九場三班1400米，小妺用「好利利」做膽，至今跑過四場獲一勝三位，演出夠晒準，今次升上三班負磅減輕，分分鐘仲好跑，可以做膽。配腳拖番上文提過既「海王子」，上場響谷草1200米入Q，表現唔曳，季內唯一頭馬就係響1400米取得，今次轉攻此程要吼實。「千江映月」同「特色咖啡」連仗跑近，都係理想配腳，四連環拖埋「川滙主帥」，評分已經減左唔少，隨時可以反彈。

　　第十一場二班1400米，鍾意葉廐「三和之星」，上場響田草1200米後上如箭得第四，證明仍然有分在手，上季已經試過響田草1400米上名，今次增程一定岩跑，排一檔可以沿途慳位，不妨做膽。

　　對手方面，「歡樂繽紛」至今七戰非冠即亞，咁準既馬一定要拖。「按得快」上場贏馬時間好快，用楊明綸減磅有權添食。「軍旗」一出即勝質素必高，都要兼顧。「賀喜」轉薛廐初出，話唔定變身。