|
|
今晚有幾個馬房值得嘜住，方嘉柏向來係谷戰穩膽，都唔使多講。另外，就係大摩同吳定強，前者忽然安排兩隻跑開田草嘅馬渡江，唔似博博吓。後者突然出馬量大增，邊似戥人高興﹖﹗
重心場次
第8場 第二班（100-80分）1800米
沙貝利似有用不完的氣力，雖然4W之後於上場斷纜，如果唔係拉士塞車，應該有Ｐ﹔回一回氣重返谷草，對手又冇咁強，條件更佳，加上韋達排1檔預咗賺（騎者季內谷草１檔入前四名比率逾５成），膽材。
「卓爾非凡」白德民好少沾手，騎兩次得亞殿幾準吓，而之前有本事同「勇敢小子」、「歡樂繽紛」埋Ｑ，只要適應到細場，隨時殺晒。
「特寶樂」分數差唔多，若不，未必會借助小梁。當然，準開係隻馬嘅賣點。「璐悅」撞到前駒，有冇機會單騎領放，真係兩睇﹖「漂亮第一」上場跟得前都幾乎贏，賽績有驚喜，計數此程仲啱，勿因係馬房第二選擇馬而輕視。
「金碧亮馬」此程的氣量靠估。「愛跑得」剛仗有揀，轉場後的確令均速性能得到更好發揮，惟末段一再內閃係美中不足，希望今次2檔幫到發揮。「悅璐孖寶」輸卡士，但磅輕路合，冷敲。
第1場 第四班（60-40分）1000米
祥禎上場明顯小將騎唔掂，直路花咗好多時間搵位，所以唔使介意那個殿軍輸得較遠﹔寧重磅都用到柏寶，無非為補鑊，跑得出兩仗前水準，至少有Ｑ。「領航動力」長期跑谷草都會揀住，始終係演出有保證。
「可圈可点」好檔而路程合適，在此班經常有殺傷力。「寶石王子」係擔心未跑前已一再腳傷。「巧奪天工」目前最強路程必是1000米，如今場有得追，追到入前列唔奇。「雙龍出海」8檔起步有點尷尬。「厲行星」賽績反覆，但能力在此又未必冇Ｐ望。
第2場 第五班（40-10分）1650米
我跑得往績之準，在五班馬身上的確唔易見得到，本身襟弗，跑法又可隨賽事形勢而作變動，冇咩大挑剔。「全勝福星」前仗頭兩段放得較快，拉士都唔斷，隔一隔又話落班，用埋小將唔使負重，基本條件算好，倘能發揮到其前速，或可帶到。
「精靈拍檔」及「華劍寶」一對馬屬此班一哩中堅，時刻有威脅。「皇仁俊駒」係擔心操練流程太疏，計實力和檔位的話，其實唔係冇得爆。「機緣滙聚」剛仗演出稍失望。「好利高」唔知體力頂唔頂得住。「浪漫添馬」最睇唔透，因上場轉跑法入Ｑ，惟轉倉初出唔知意向如何。
第3場 第三班（80-60分）1200米
駿蹄飛前次看重，結果入Ｑ，引證到只要演繹得好，在此班唔係冇出頭本事﹔隔紗後返回谷戰，對手唔見得比前仗惡，贏面唔細。「活力至寶」輸了場地及10檔，但論級數則勝過同場大部分馬。
「化工之昇」上場因「外遊」才大敗，勿過早灰心。「靚得開心」要有夢幻形勢幫手才有競爭力。「天子駕六」對上兩仗在路程上變動大，一樣拒絕大敗，肯返短途和加配件，或可變身，大冷門在此。「御將軍」整體條件四正，但上到三班略有阻力了。
第4場 第四班（60-40分）1650米
皇帝旨令集中跑一哩冇錯，上場初跑兼劣勢下仍不致大敗，性能唔會曳得去邊﹔落入韋達手上，加埋檔位內移，預期走位必較上場理想，再畀機會。「威威福星」長期係班內此程的勁旅，只要賽事中唔係太蝕，不難入圍。
「得令先鋒」一哩的長力係博博吓，不過，按剛賽1200米的追勢推算，似乎有機會勝任。「好友緣」上賽已建議博定先，跑獲第四名算及格，既呈上升勢頭，值得再跟。「順利多」近仗普普通通﹔「燈胆寶」賽績突然回落，兩駒最多拖腳。
第5場 第四班（60-40分）1200米
喜在心頭剛仗賽績要高度尊重，因之前贏完例冇Ｐ，但上場幾乎再Ｗ，大有欲罷不能的味道，破格之馬宜重視。「家橋」在田草也輸得不遠，去到直路中段仍湧得吓，近況唔會差﹔轉頭即回到唯一勝途，仲出動埋柏寶，動態似樣。
「奪寶群英」分數減到過晒籠，遇到一場或步速偏快的場合，可能撈到油水。「成功年代」換人未必幫到幾多，加上10檔或影響發揮，最多位置。「偉龍」上場頭馬水準值得商榷。「雄爆」跑短好過跑中程。
第6場 第三班（80-60分）1650米
福喜過去三班此程準開（4戰得冠亞季各一），降班寧重磅都用韋達，誠意夠晒，由於近績曳，可收降溫效用，更覺抵博。「旺家多寶」剛仗連外叠發力都唔怕，確認進步，呢次2檔仲正。
「易搏贏」和「追月」唔似有冠軍相，但未至於沒有上名本事。「本地實力」唔怕匆出，但長期都只跑三至六名，限拖腳。「喜勝威」閃閃身連近兩場，特登唔落班，或會殺個措手不及。「銀太陽」分利卻態沉。「得寶飛駒」跑唔番上季水準。
第7場 第三班（80-60分）1800米
智友和「利好」乃今場主角，前駒上場如果唔係直路一度困守遲咗望空，應該衝贏「引伸波幅」，另一方面，初跑此程只係輸少少，睇嚟能力比一哩更佳，肯再跑同程，必求補中﹔後駒好得番，根本在此分好惡。
「鵬力洋洋」情況與「智友」相近，正路配腳。「星際雄師」及「包裝好友」各有隱憂，充其量作配。「好著數」終於唔再跑田草，肯跑番谷草長途，可以開始留意。 |
|
金睛卡
发表于 2010-5-19 07:41
变色卡
显身卡