馮諾嘉手記：中國心出真功夫

魑魅魍魉

　　今日沙田十一場賽事，重頭戲當然係第八場香港一級賽遮打盃2400米，真係期待已久，皆因小妹好鍾意嘅「家家興旺」在陣，雖然只得七匹馬參戰，但匹匹都係對手，因為「家家興旺」評分最低，上場初次挑戰級際賽皇太后紀念盃，結果畀佢後上爆出20倍冷 W，以一頭位贏咗大熱門「至勇威龍」，嗰場後駒轉彎時過早發力致敗，其實今季仲不斷有進步，贏過打吡預賽，今場有力補中，可以做膽。至於「家家興旺」，無疑上場贏馬有啲運，但賽馬無絕對，今次捧走埋遮打盃亦唔出奇，配腳當然要拖。「好先生」同「包裝大師」近仗表現明顯有啲下滑，「極品絲綢」同「威利旺旺」就未跑過2400米，冇長力根據，「爆冷」四戰遮打盃獲三冠一亞，戰績咁好點都要拖，「極品絲綢」近態當弗，雖然初跑呢程亦要兼顧。

1400米正宗

　　精選場次第七場四班1400米，用「中國心」做膽，季內跑過六場，前仗落四班跑田草1000米直路賽，只係以四分三馬位之差屈居亞軍，狀態回勇，上場跑1200米亦輸唔遠，今場終於跑番贏馬路程1400米，可以發揮真正威力。配腳方面，「高升」前仗谷草1200米跑第二，上場轉跑泥地，外檔起步兼走外叠，落敗唔可以作準，今場回師草地，機會重臨。拖埋「上海先鋒」同「較量」，前駒在港兩戰都跑近，上場只以頸位跑第三，後駒上場亦獲季軍，兩匹馬最近走勢都有進步，三甲之材。

　　第十場三班1600米，「曬冷王」質新馬在港跑過三場，愈跑愈近，上場1400米後追以個幾馬位跑第三，今場增程再戰，當然係想畀多二百米佢追，動用王牌報名決心好大，可望打開勝利之門，做膽。配腳先拖「騰雲駕霧」，季內五仗共獲兩冠一亞一季一殿，睇贏馬走勢，實力點止值第三班，係嫌佢磅重，但位置應穩。「海力童」近仗谷草兩度入位，狀態當弗，回師沙田亦要防。「威騰駒」上場再度屈居第二，只以頸位之差輸畀「駿馬精英」，後駒再出再贏，可見賽事水準高 ，要兼顧。