馮諾嘉手記：卓爾非凡少個勁敵

魑魅魍魉

　　上次沙田日賽因為雨勢太大，賽事被迫腰斬，尾兩場賽事取消，馬會增加場次少不免，跑十一場賽事頭場開跑時間提早，相信唔少馬迷已經習慣，但係呢次沙田日賽，頭場開跑時間更加早，皆因要現場轉播日本安田紀念賽。

　　安田紀念賽一向都好受馬迷關注，加上今次有成三匹本地馬遠征，包括「締造美麗」、「勝眼光」同「友誼至上」，近期港隊遠征都有收穫，最近「綠色駿威」喺新加坡奪得國際短途錦標，令唔少馬迷對今次港馬遠征日本充滿憧憬。

　　不過，今次港馬征日難度比起新加坡一役更高，皆因咁多年嚟只有「靚蝦王」同「牛精福星」成功奪盃，證實呢項大賽嘅水準絕對唔可以睇小。為咗轉播呢場賽事，頭場開跑時間提前到十二點三，想食埋午飯先至入場嘅馬迷，未必趕得切睇頭場，賽事安排咁緊湊，投注額如何﹖真係要跑過至知﹗

　　上個禮拜日尾兩場賽事取消，令到大摩一對準備搏命嘅「曬冷王」同「卓爾非凡」大受影響，惟有乘勇再戰，大摩隨即再幫佢哋報名，前駒列陣今次第七場三班1600米，呢匹馬在港跑過三場，上場田草1400米已經跑入季軍，狀態漸入佳境，質新當起，追捧佢贏馬開齋。

　　第十場二班1600米嘅「卓爾非凡」，喺香港連番入位而未能打開勝門，今次對手稍為比上個禮拜日嗰場弱，起碼少咗蔡約翰匹「正毅」，對「卓爾非凡」嚟講係好事，可望贏番場。