借題發揮：盈彩繽紛7W具意義 韋達闖高峰

魑魅魍魉

　　今日頭場出馬多寡其實唔係咁重要，最緊要還是結果，正如當年「翠河」遠征澳洲之前，咪一樣整咗場2300米賽事畀佢參加，等佢符合當地出賽資格，記得嗰場咪又係小貓4 件之嘛（冇記錯尚有「玉峽生輝」、「北龍泉」等等）。另外，當年短途巨星「娛樂之皇」，亦試過參加一場只得3駒角逐的賽事，而再遠啲嘅兩駒單打獨鬥場面，亨利未睇過，所以無謂扮記得。

　　講番呢次頭場，的確係有深層意義，撇開冇乜賭味（唔係1 號2 號，唔通博3-4單Q咩！），始終多年以來都冇馬可以締造一季7W，講到近代嘅6W馬則唔少，如「飛躍龍門」、「豐富」、「精英大師」等等，而就算強如當日「精英大師」17 連勝，亦冇試過一季7W。所以，等到今時今日嘅「盈彩繽紛」有機會破紀錄，真係等到頸都長。至於講到鞍上人韋達，今季都破咗個人宿命，打吡終於有佢份，數據破開就破，希望佢到時醒醒定定，順利以壓一的姿態破魔咒。

同歡笑段段有

　　當然，「盈彩繽紛」冇乜賭頭，而望落韋達今日嘅坐騎，幾乎全線有飛，就連初出嘅「安鞍」亦然，睇佢個勢好似想有樣學樣，阿寶一日6W，韋達亦想試吓。至於揀W對象，「同歡笑」和「飛闖」幾合眼緣，前駒上場放到甩轆，拉士唔斷好犀利；後駒正頭正路返1200米，仲用埋韋達，慌死唔熱，應該唔會縮槓，一於整條2x3W。
　
亨利