數據人生：飛躍星河有路捉

魑魅魍魉

　　臨近季尾，不少馬經版的賽後新聞，幾乎不是韋達便是柏寶做主角，老實說筆者亦覺得有點悶，但他們於騎師榜上你追我趕，又難免成為焦點所在。不過，要數經常於馬經版出現的騎師，其實白德民亦肯定不少，只不過多為負面新聞而已！但自從他策「閒話一句」的處理手法備受非議後，之後陣上表現的確「正常」得多，至少大部分坐騎不論冷熱，均較少出現令人眼冤的鏡頭。

　　明晚白德民獲五匹坐騎上陣，其中四駒出自波士大摩馬房，而「飛躍星河」居五班跑中長途夠分量，宜優先留意。第一場五班1800米，大熱隨時是華廐新勝馬「喜相逢」，主帥都爾停賽即強配柏寶，以上仗後追贏谷草一哩的姿態計，預計增程二百米應更合，但考慮到鞍上人手風麻麻，似乎作配較合。相反，「飛躍星河」近仗連番接近，尤其對上兩仗排外檔不利仍愈追愈勁得第四，足證狀態未有回落；既然近期白德民坐騎跑谷草1800米成績甚佳，有路捉一於作為重心。

歐陽志恆