洪禮賢講馬YIN''''S TALK：太陽昇夠經典

博彩老头

　　走到街上，遠處看到那人的背影似嘉豪，點知走上前叫佢，先至發覺原來係穎豪！

　　我想，雖然上述呢個例子牽強多少，兩位老友記身形各有不同，但喺條街認錯人時有發生，莫講話朋友會認錯，日日對住的街坊街里，周不時都會認錯我（可能我個樣太普通）。這則乃真人真事，從前擇居西環，曾經多次有幾個街坊都話：「咦，洪生，上個禮拜你唔係喺嗰度飲茶咩？」實情係期間我根本不在港，類似的事當年發生不下十次八次。

　　上述情況，除非真係有異度空間， 或是時光機，再唔係，就係我一《HEROES》入便識得穿梭時空的日本人，若不，街坊們不過是認錯人！咁，究竟我哋又會唔會認錯馬，所指並唔係評述員講走位嘅時候噏錯馬名，而係陣上對賽駒的認知，有否存在差異，明明霎眼嬌，認錯佢好超！以為險勝，原來勝完可以再勝。

馬匹締速非絕對

　　雖則締速唔會呃人，馬匹亦唔可能超乎極限，像我與你永遠都唔會跑到保特咁快，但在賽馬世界，時間唔快係咪代表冇得贏？似乎又未必。

　　剛季最經典例子，莫過於「太陽昇」，3月頭贏場四班谷草1200 米（ 好地），該場總時間曾經係季內最慢（最終季尾有兩匹頭馬慢過佢），以為1W之後仲邊有運行，但只係隔了一場，跟住何止贏多場，打叠兩W，殺埋上三班仲有P，服未！？

■ 洪禮賢　馬會賽馬節目主持